منداڵانی خوار تەمەن 12 ساڵ بەشەخۆراکیان پێدەدرێت

PUKMEDIA

پسووڵەی ئەلکترۆنی خۆراک

وەزارەتی بازرگانیی عیراق خزمەتگوزاریی جیاکردنەوەی خێزانەکانی لە لقی بەشەخۆراکی چەندین پارێزگای عیراق و هەرێمی کوردستان لەڕێگەی بەرنامەی ئەلیکترۆنییەوە کاراکرد، بەڕێوەبەری پسووڵەی خۆراکی سلێمانیش دەڵێت: پرۆسەی زیادکردنی منداڵان لە سیستەمەکەدا بەردەوامە و لە مانگەکانی داهاتووەوە بەشەخۆراکیان پێدەدرێت.

ئاراس محەمەد بەڕێوەبەری پسووڵەی خۆراک لە سلێمانی بەوێبسایتی رەسمیی یەکێتیی نیشتمانیی کوردستان PUKMEDIA ی راگەیاند: وەزارەتی بازرگانیی عیراق خزمەتگوزاریی جیاکردنەوەی خێزانەکانی لە لقی بەشەخۆراکی پارێزگاکانی (نەینەوا، کەرکووک، سلێمانی، هەولێر، هەڵەبجە، بەسڕە، زیقار، میسان، دیوانییە، موسەنا، سەڵاحەدین، ئەنبار، بەلەد، کەربەلا، و نەجەف) لە رێگەی بەرنامەی ئەلیکترۆنیی کارتی بەشەخۆراکەوە کاراکرد.

راشیگەیاند: سەرەڕای زیادکردنی ئەم داواکارییە لەبەرنامەکەدا پرۆسەی زیادکردنی منداڵیش کۆتایی پێنەهاتووە و بەردەوامە، هاوکات ئەو کەسانەشی کە تا ئێستا پسووڵەی خۆراکەکەیان بە ئەلکترۆنی نەکردووە دەتوانن سەردانی بەڕێوەبەرایەتی پسووڵەی خۆراک بکەن تاوەکو کۆدیان بۆ وەربگرین.

بەڕێوەبەری پسووڵەی خۆراک ئاماژەی بەوەشکرد: لەسەرەتای کاراکردنی ئۆپشنی زیادکردنی منداڵی خوار تەمەن 12 ساڵانەوە تا ئێستا بەڕیژەیەکی باش منداڵ داخڵی سیستەمەکە کراوە و پێشبینی دەکەین بەشێک لەخێزانەکان بەشەخۆراکی منداڵەکانیان لە مانگەکانی داهاتووەوە وەربگرن.

ئەمەش لەکاتێکدایە، نزیکەی ساڵێکە پرۆسەی بەئەلیکترۆنیکردنی فۆڕمی خۆراک لە هەرێمی کوردستان و پارێزگاکانی دیکەی عیراق دەستپێکردووە و تا ئێستاش بەردەوامە.

PUKMEDIA