لیژنەی ئاسایش: رەشنوسی پرۆژەیاسای خانەنشینی هێزەکانی ئاسایشی ناوخۆ تەواو بووە

سەباح

سەرۆکی ئەنجومەنی نوێنەران و لیژنەی ئاسایش و بەرگری

لیژنەی ئاسایش و بەرگری ئەنجومەنی نوێنەرانی عیراق، رایدەگەیەنێت: پرۆژە یاسای هێزەکانی ئاسایشی ناوخۆ تەواو بووە و چەندین بڕگەی وەک تەمەن و ساڵی خزمەت و شایستە دارایی و بڕوانامە باڵاکان لەخۆ دەگرێت.

عەلی نەهیر ئەندامی ئەنجومەنی نوێنەرانی عیراق، بە رۆژنامەی سەباحی راگەیاند: لیژنەکەمان رەشنوسی هەمواری دووەمی پرۆژە یاسای خزمەت و خانەنشینی هێزەکانی ئاسایشی ناوخۆی تەواو کردووە، ئەمەش دوای ئەوە هات کە چەندین کۆبوونەوەمان لەگەڵ لایەنە پەیوەندیدارەکاندا ئەنجامدا.

لە بارەی بڕگەکانی پرۆژە یاساکەش، پەرلەمانتارەکەی عیراق، ئاشکرای کرد: تەمەنی خانەنشینی لە 45 ساڵەوە بۆ 40 ساڵ کەمکراوەتەوە، بەو مەرجەی خزمەتی لە 15 ساڵ کەمتر نەبێت.

وتیشی: چەندین بڕگەی دیکە بۆ رەشنوسەکە زیاد کراوە، وەک زیادکردنی پارەی خواردن بۆ مووچەی بنەڕەتی، ئەمە جگە لەوەی خاوەن بڕوانامە باڵاکان لە رووی وەزیفیەوە، پێشخستنیان بۆ دەکرێت، بەشێوەیەک بڕوانامەی دکتۆرا دوو ساڵ و ماستەر یەک ساڵ دەبەخشرێن لەکاتی بەرزکردنەوەی پلەکانیان.

پەیوەست بە گرێبەستەکانیش، رایگەیاند: هەر کارمەندێکی گرێبەست، ئەگەر شەهید بوو، ئەوە وەک دامەزراندنی هەمیشەیی مامەڵەی لەگەڵ دەکرێت و بریندارانییش پلەی مولازمیان پێدەدرێت، ئەگەر رێژەی برینداربوونەکەشی 50% زیاتر بوو، ئەوە پلەی بەرزتری پێدەدرێت.

لە کۆتایشدا، رایگەیاند: لیژنەکەمان لە چەند رۆژی داهاتوودا، پرۆژە یاسای وەزارەتی بەرگریش تەواو دەکات، بۆ ئەوەی دادپەروەری بۆ تەواوی هێزە ئەمنییەکان دەستەبەر بکرێت.

PUKMEDIA