ئەمڕۆ پەرلەمانی عیراق کۆبوونەوەکانی دەستپێدەکاتەوە

راگەیاندنى ئەنجومەنى نوێنەران

وێنەى کۆبوونەوەیەکى پێشترى پەرلەمان

ئەمڕۆ ئەنجومەنی نوێنەرانی عیراق دانیشتنەکانی دەستپێدەکاتەوە و خوێندنەوەی یەکەم بۆ چەند پڕۆژەیاسایەک دەکات.

فەرمانگەی کاروباری پەرلەمانی لە ئەنجومەنی نوێنەرانى عیراق کارنامەی یەکەم دانیشتنی لە وەرزی دووەمی یاسادانان - ساڵی یەکەمی یاسادانان بڵاوکردەوە، کە بڕیارە ئەمڕۆ دووشەممە 6ى تەممووزی 2026 سەعات یەکى پاشنیوەڕۆ بەڕێوەبچێت، کارنامەکە لە 4 بڕگە پێکدێت و تێیدا خوێندنەوەی یەکەم بۆ چوار پڕۆژەیاسا دەکرێت، کە بریتین لە: پێشنیازەیاسای تاوانە ئەلیکترۆنییەکان، هەموارکردنی یاسای چاودێریی نەوجەوانان، هەموارکردنی یاسای پارێزەرایەتی و پێشنیازەیاسای پارەدارکردنی بەهێزکردنی سیستمی بەرگریی ئاسمانیی عیراق.

کارنامەی دانیشتنەکە دەنگدان بۆ تەواوکردنی کابینەی وزاریی نوێ لەخۆناگرێت، ئەمەش لە کاتێکدایە کە هێشتا 9 وەزارەت بە وەکالەت بەڕێوەدەبرێن و وەزیرەکانیان نەیانتوانیوە متمانەی پەرلەمان بەدەستبهێنن لەو دانیشتنەی کە لە 14ی ئایاری 2026 بۆ دەنگدان لەسەر حکومەت بەڕێوەچوو.

PUKMEDIA