سەرۆکوەزیرانی عیراق: سەرچاوەکانی گەندەڵی وشک دەکەین

واع

سەرۆکوەزیرانی عیراق لە وەزارەتی بەرگری

سەرۆکوەزیرانی عیراق، دووپاتی دەکاتەوە، کە رێگا نادەن چەک لە دەرەوەی دەوڵەت و یاسادا بوونی هەبێت و دەشڵێت: لەسەر رووبەڕووبونەوەی گەندەڵی و وشککردنی سەرچاوەکەی بەردەوام دەبین و گرنگیشە سوپای عیراق، سوپایەکی پیشەیی و بەهێز بێت.

عەلی زەیدی سەرۆکوەزیرانی عیراق و فەرماندەی گشتی هێزەچەکدارەکان، سەردانی وەزارەتی بەرگری کرد و بڕیاری پلە بەرزکردنەوەی ئەفسەرانی ئیمزا کرد.

 لەو سەردانەدا و لە کۆبوونەوەی لەگەڵ ئەفسەرانی باڵای وەزارەتەکە، سەرۆکوەزیرانی عیراق، رایگەیاند: سورین لەسەر ئەوەی ئەفسەران پلەی شایستەی خۆیان وەربگرن، بەپێی ئەو خشتەیەی کە کاری لەسەر دەکرێت.

وتیشی: حکومەتی عیراق، گرنگییەکی زۆر بە پێشخستنی سوپای عیراق دەدات، بەشێوەیەک ببێتە سوپایەکی پیشەیی و بەهێز، بیروڕای سەرەکی پاراستنی وڵات و گەلەکەی بێت.

 هەر لە کۆبوونەوەکەدا، سەرۆکوەزیرانی عیراق، دووپاتی کردەوە، رێگا نادەن چەک لە دەرەوەی دەوڵەت و یاسادا بوونی هەبێت.

دووپاتیشی کردەوە: بەردەوامین لە رووبەڕووبونەوەی گەندەڵی و وشکردنی سەرچاوەکانی، بۆ ئەوەی دەوڵەت لەسەر بنەمای یاسا و دادپەروەری دابمەزرێت و هاووڵاتیانیش لە ئاسایش و سەقامگیریدا بن.

PUKMEDIA