ئەڵمانیا سیستمی بەرگریی ئاسمانی پاتریۆتی لە باكوری كوردستان جێگیركرد

DPA

سیستمی بەرگریی ئاسمانی پاتریۆت

لە چوارچێوەی پلانی بەرگریی هاوپەیمانی باكووری ئەتڵەسی (ناتۆ)دا، گۆڕانكاری لە پێكهاتەی سیستمی بەرگریی ئاسمانیی لە پارێزگای مەلەتیی باكووری كوردستان كراوە.

زەكی ئاكتورك وتەبێژی وەزارەتی بەرگریی توركیا رایگەیاند، یەكەیەكی سیستمی بەرگریی ئاسمانیی پاتریۆتی سەر بە ئەڵمانیا لە بنكەی كورەجیك لە پارێزگای مەڵەتی جێگیر كراوە و لە رۆژی 24ی ئەم مانگەدا بە رەسمی ئەركی پاراستنی ئاسمانیی ناوچەكەی لە سیستمی پاتریۆتی ئەمریكی وەرگرتووە، كە پێشتر لەو بنكەیەدا جێگیر بوو.

پێشتر لە چوارچێوەی پلانی بەرگریی هەمیشەیی هاوپەیمانێتیی ناتۆ و بە مەبەستی بەهێزكردنی چەتری بەرگریی ئاسمانیی ناوچەكە، لە 18ی حوزەیرانی ئەمساڵ، یەكەیەكی سیستمی پێشكەوتووی بەرگریی ئاسمانیی سەر بە ئیتاڵیا لە فەرماندەیی بنكەی سێیەمی سەرەكیی فڕۆكە جەنگییەكان لە شاری كۆنیا داندرا.

هاوپەیمانیی ناتۆ لە دوای ئاڵۆزییە جیۆپۆلەتیكییەكانی ناوچەكە و شەڕی ئێران و ئەمریكا، بەردەوامە لە زیادكردنی توانای بەرپەرچدانەوەی هەڕەشە ئاسمانی و مووشەكییەكان لە ناوچەكە و پاراستنی ئاسمانی وڵاتانی ئەندام لەم هاوپەیمانێتییە نێودەوڵەتییەدا.

بنكەی سەربازیی كورەجیك لە مەڵەتیی باكووری كوردستان، لە ساڵی 2012ەوە وەك بنكەیەكی گرنگی راداری هۆشداریی پێشوەختەی ناتۆ كار دەكات، كە ئامانجی سەرەكیی ناسینەوە و بەرپەرچدانەوەی مەترسییە موشەكییە بالیستییەكانە لە دەرەوەی سنوورەكانی ناتۆ.

PUKMEDIA