ئامەدسپۆر خانمێکی کورد لە کازاخستانەوە دەخاتە ناو دەستەی کارگێڕییەوە

تایبەت

نادیرە نادیرۆڤا خانمە بازرگانی ناوداری کورد

یانەی تۆپی پێی ئامەدسپۆر، کە لە خولی پلە یەکی تورکیادا کێبڕکێ دەکات، نادیرە نادیرۆڤا خانمە بازرگانی ناوداری کوردی کازاخستانی؛ وەک ئەندامێکی نوێی دەستەی کارگێڕی یانەکە دەستنیشان کرد.

بڕیارەکەی ئامەدسپۆر، لە چوارچێوەی ستراتیژێکی نوێدایە بۆ ڕاکێشانی وەبەرهێنانی دەرەکی و بەهێزکردنی بنکەی کارگێڕی و دارایی خۆی، بەهۆی ئەمەشەوە پێگەی خۆی لە رکابەرایەتییە ناوخۆیی و هەرێمییەکاندا بەرزتر دەکاتەوە.

ئامەدسپۆر ، بنکەکەی لە شاری ئامەدە لە باکوری کوردستان، خاوەنی بنکەیەکی جەماوەریی بەرفراوانە لەسەر ئاستی ناوخۆ و تاراوگە، هەروەها شیکەرەوانی کەرتی وەرزش ئاماژە بەوە دەکەن ؛ هاتنی نادیرۆڤا کە خاوەنی ئەزموونێکی بەرفراوانە لە کەرتی بازرگانی و دارایی لە ناوچەی ئاسیای ناوەڕاست، دەکرێت دەرفەتی نوێ بۆ سپۆنسەرکردن و دابینکردنی سەرچاوەی دارایی جێگیر بۆ یانەکە بڕەخسێنێت.

هاوکات، کارگێڕیی یانەکە جەخت لە گرنگی ئاوێتەکردنی لێهاتوویی پیشەیی و هێنانە پێشەوەی پسپۆڕانی کورد لە دەرەوەی وڵات دەکەنەوە، بە ئامانجی هاوسەنگکردنی پلانە وەرزشییەکان لەگەڵ بەڕێوەبردنێکی هاوچەرخ کە توانای ڕووبەڕووبوونەوەی ئاڵنگارییە داراییەکانی هەبێت.

PUKMEDIA