وه‌رگرتن و دابه‌شكردنه‌وه‌ی غازی ماڵان لەسلێمانی رێك ده‌خرێته‌وه‌

PUKMEDIA

کۆبوونەوەی قائیمقامی سلێمانی لەگەڵ نوێنەری کارگەکانی غاز

 قائیمقامیه‌تی سلێمانی رایدەگەیەنێت: ئه‌و بڕه‌ غازه‌ی دێته‌ نێو شاری سلێمانی به‌شێوه‌یه‌كی یه‌كسان ده‌درێت به‌ كارگه‌كان و له‌ژێر چاودێری قائیمقامیه‌تدا به‌سه‌ر هاوڵاتیاندا دابه‌ش ده‌كرێن، بڕی پێویستیش غاز خه‌زن ده‌كرێت بۆ وه‌رزی زستان.

ئه‌مڕۆ 2ی6ی2026 فازڵ عومه‌ر قائیمقامی سلێمانی به‌ وه‌كاله‌ت به‌ ئاماده‌بوونی لیژنه‌ی باڵا و لیژنه‌ی غازی سه‌ر به‌ لیژنه‌ هاوبه‌شه‌كان له‌گه‌ڵ خاوه‌ن كارگه‌كانی غاز كۆبووه‌وه‌ و گفتوگۆ كرا له‌سه‌ر چۆنێتی وه‌رگرتن و دابه‌شكردنی ئه‌و بڕه‌ غازه‌ی پشكی سلێمانییه‌ به‌سه‌ر كارگه‌كانی غازدا، بۆئه‌وه‌ی به‌ پلان و له‌ژێر چاودێریدا بگات به‌ ده‌ستی هاووڵاتیان.

هاوکات، وه‌رزێر عه‌بدوڵڵا نوێنه‌ری كارگه‌كانی غازی سلێمانی رایگه‌یاند: ئه‌و بڕه‌ غازه‌ی ئێستا دێته‌ شاری سلێمانییه‌وه‌ به‌شی پێویستی ده‌كات و كێشه‌ی كه‌می بڕی غازمان نه‌ماوه‌، ده‌ستخۆشی له‌ قائیمقامیه‌ت و لیژنه‌ هاوبه‌شه‌كان ده‌كه‌ین كه‌ هاوكاربوون بۆ رێكخستنه‌وه‌ی دابه‌شكردنی غاز به‌سه‌ر كارگه‌كان و دواتر هاووڵاتیاندا.

راشیگەیاند: پلانمان داناوه‌ لەم کاتەدا بڕێكی زۆر غاز له‌ كۆگاكانماندا هه‌ڵبگرین بۆئه‌وه‌ی له‌ وه‌رزی زستاندا بدرێت به‌ هاووڵاتیان و كێشه‌ی كه‌مبوونه‌وه‌ی غاز دروست نه‌بێت، چونکە له‌ وه‌رزی هاویندا داواكاری له‌سه‌ر غازی ماڵان كه‌متره‌.

PUKMEDIA