راپەڕین دەبێتە سەنتەری وەبەرهێنانی ناوخۆیی و بیانی

راگەیاندنی قوباد تاڵەبانی

قوباد تاڵەبانی دەزگای پەرەپێدانی ناوچەیی راپەڕینی راگەیاند

بە سەرپەرشتی قوباد تاڵەبانی، جێگری سەرۆكوەزیران لە رێوڕەسمێكدا لە ئیدارەی راپەڕین، دەزگای پەرەپێدانی ناوچەیی راپەڕین بە رەسمی راگەیەنرا و لە ئەمڕۆوە جێبەجێكردنی پڕۆژەی گەشەپێدانی دەڤەری راپەڕین دەست پێدەكات.

لە رێوڕەسمەكەدا كە رۆژی یەكشەمە 31ی 5ی 2026،  بە ئامادەبوونی هەر یەكە لە كونسوڵەكانی بەریتانیا و فەڕەنسا و ئەرمینیا بەڕێوەچوو، جێگری سەرۆكوەزیران لە وتارێكدا رایگەیاند: پاش توێژینەوە و راوێژێكی زۆر لەگەڵ پسپۆڕانی ناوخۆ و ناوەندە ئەكادیمییەكان و هاوبەشە نێودەوڵەتییەكان بە تایبەتیش حكومەتی بەریتانیا، پڕۆژەی دروستكردنی دەزگای پەرەپێدانی ناوچەیی راپەڕینمان دروست كرد.


وتیشی: ئەم دەزگایە وەك چەترێك وایە كە كەرتی تایبەت و كەرتی گشتی و زانكۆ و ناوەندە ئەكادیمییەكان، كۆمەڵگای مەدەنی و هەموو چین و توێژەكانی دەڤەرەكە  بە شێوەیەكی چالاكانە بەشدار دەكات لە پڕۆسەی گەشەپێدانی ئیدارەی راپەڕین.

قوباد تاڵەبانی روونیشیكردەوە: دەزگاكە جگە لەوەی كە ناوەندێكی توێژینەوەیە، شێوازێكی نوێشە بۆ ئیدارەدانی ناوچەكە و هەموو گرفتەكانی بەردەم گەشەپێدان و وەبەرهێنان لە بوارە جیاوازەكاندا چارەسەر دەكات و هاوكار دەبێت لە جێبەجێكردنی بیرۆكە نوێیەكان و ناوچەكە دەكاتە سەنتەرێك بۆ راكێشانی وەبەرهێنانی ناوخۆیی و بیانی. 

جێگری سەرۆكوەزیران سوپاسی هاوبەشە نێودەوڵەتییەكان و بە تایبەتیش حكومەتی بەریتانیای كرد كە پشتیوان و بەشدارن لە پرۆسەی پەرەپێدانی ناوچەیی راپەڕین و وتیشی لە داهاتوویەكی نزیكدا ئەم مۆدێلە لە پەرەپێدان لە ناوچە و دەڤەرەكانی دیكەی كوردستانیش جێبەجێ دەكرێت.