قائیمقامیەت بۆ هاووڵاتیان: رێگە مەدەن ئاژەڵەکانتان بەشێوەی ناتەندروست بۆ سەرببڕن

راگەیاندنی قائیمقامییەتی سلێمانی

چاودێریکردنی سەربڕینی ئاژەڵان بۆ قوربانیی

سەرۆکی لیژنە هاوبەشەکانی قائیمقامیەتی سلێمانی داوا لەهاووڵاتیان دەکات، رێگە نەدەن لە شوێنی خراپ و نا تەندروستدا ئاژەڵەکانیان بۆ سەرببڕدرێت، دەشڵێت: لەگەڵ هێزە ئەمنییەکان بەردەوام لە ئەرکداین و هەر ئاژەڵفرۆشێک یان قەسابێک لە دەرەوەی قەسابخانەی رێگەپێدراو ئاژەڵ سەرببڕێت رێکاری یاسایی لەگەڵ دەگرینە بەر.

بابان ئەحمەد سەرۆکی لیژنە هاوبەشەکانی قائیمقامیەتی سلێمانی رایگەیاند: لە یەکەم رۆژی جەژندا لیژنەکانمان لە ئەرکدان و چاودێری چۆنێتی قوربانیکردن دەکەن، داواش لە هاووڵاتیان دەکەین کە ئەوان کارێکی خێر دەکەن، بۆیە رێگە نەدەن لە شوێنی خراپ و نا تەندروستدا ئاژەڵەکانیان بۆ سەرببڕدرێت.

راشیگەیاند: لەگەڵ هێزە ئەمنییەکان بەردەوام لە ئەرکداین و هەر ئاژەڵفرۆشێک یان قەسابێک لە دەرەوەی قەسابخانەی رێگەپێدراو ئاژەڵ سەرببڕێت رێکاری یاسایی لەگەڵ دەگرینە بەر و رێگە نادەین گۆشت و ئاژەڵی ناتەندروست بچێتە ماڵەکانەوە، چونکە مەترسی بۆ سەر ژیان و تەندروستی هاووڵاتیان دروست دەکات.

PUKMEDIA