گرنگترين رێنماییە تەندروستییەکانی قوربانیکردن بۆ رێگری لەبڵاوبوونەوەی تای خوێنبەربوون

PUKMEDIA

قوربانيی

بەڕێوەبەرایەتی تەندروستی ئاژەڵ لەوەزارەتی كشتوكاڵی هەرێم بەمەبەستی خۆپاڕێزی و ڕێگریكردن لەسەرهەڵدان و بڵاوبونەوەی تای خوێن بەربوون، چەند رێكارو رێنماییەكی بۆ قوربانیكردن بڵاوكردەوەو رایگەیاند: پێویستە لەڕۆژانی جەژندا بە ئامادەبوونی ستافی پزیشكی ڤێتێرنەری سەربڕخانەكان كراوەبن و هاووڵاتیانیش كەل و پەلی خۆپارێزی لەكاتی مامەڵەكردن لەگەڵ گۆشت و پاشماوەی قوربانی بەكاربهێنن.

دەقی رێنماییەكان:

ڕێكار و ڕێنماییەكانی قوربانیكردن بۆ خۆپاڕێزی لە نەخۆشی تای خوێن بەربوون 

بەمەبەستی ڕێگریكردن لە سەرهەڵدان و بڵاوبونەوەی نەخۆشی بەتایبەتی (نەخۆشی تای خوێن بەربوون) كەلەئێستادا  بڵاوبۆتەوە  بەڕێوەچوونی مەڕاسیمی قوربانیكردن بە شێوازێكی تەندروست، لەپێناو بەرژەوەندی گشتی و پاراستنی ژیانی هاووڵاتیان، جەخت دەكەینەوە لەم ڕێكارە ڤێتێرنەری و ڕێنماییانەی خوارەوە بەمەبەستی جێبەجێ كردنیان و هەماهەنگی لایەنە پەیوەندارەكان، پەیڕەوكردنیان لەلایەن هاووڵاتیانەوە بڵاوكردنەوەیان لە دەزگا ڕاگەیاندنەكان:

1.لەڕۆژانی جەژنی قوربان سەربڕخانەكان كراوە بن بە ئامادەبوونی ستافی پزیشكی ڤێتێرنەری بەمەبەستی پشكنینی ئاژەڵ و گۆشتی قوربانی.

2.ناوی سەربڕخانە كراوەكان و خشتەی كاتی كاركردن لە دەزگاكانی ڕاگەیاندن و یەكە ئیداریەكان ڕابگەیەنرێت بۆ ئاگاداری هاووڵاتیان. 

3.جەختكردنەوە و توند و تۆڵكردنەوەی ڕێكارەكانی پشكنینی پێش سەربڕین و دوای سەربڕینی ئاژەڵ و پشكنینی گۆشتی بەرهەم هاتوو.

4. پەیڕەوكردنی ڕێنماییەكانی خۆپارێزی وە پاك و خاوێن ڕاگرتنی سەربڕخانەكان و دەوروبەری سەربڕخانەكان وە ڕشاندنیان بە دەرمانی تایبەت .

5.پێویستە ئاژەڵ ساغ بێ و هیچ نیشانەیەكی نەخۆشی نەبێت. نابێت ئەو ئاژەڵەی كە گەنە( قرنە) ی پێوەیە سەرببڕێت. 

6.دەبێت ئاژەڵەكە دەرمانی چارەسەری پێنەدرا بێت بۆ ماوەی سێ هەفته ، وەهەر ئاژەڵێك دەرمانی چارەسەركردنی پێدرابێت نابێت ڕاستەوخۆ سەرببڕدرێت بەڵكو پێویستە ماوەی سەربڕین  دوای بەكارهێنانی دەرمان بە پێی ڕێنمایی پزیشكی ڤێتێرنەری بێت. ‌   

7.پێویستە لەسەر كەسی قوربانیكەر ( قەساب و هاووڵاتی) :

بە گرتنەبەری گشت ڕێكارەكانی خۆپارێزی و پاك وخاوێنی لەكاتی سەربڕینی ئاژەڵ و گۆشت ئامادەكردن بەتایبەتی بەكارهێنانی دەستكێشی لاستیكی و جلی تایبەتی خۆپارێزی  ....هتد. هەروەها شوشتن و تەعقیم كردنی دەست و كەلوپەلەكان دوای بەكارهێنان و دەستدان لە گۆشت و سەربڕینی ئاژەڵ.

8.ڕێنمایی هاووڵاتیان بكرێت ‌:

 - بەكارهێنانی كەل و پەلی خۆپارێزی لەكاتی مامەڵەكردن لەگەڵ گۆشت و پاشماوەی قوربانی.

_ دووركەوتنەوە لە كۆبونەوە لەدەروبەری ئاژەڵ لەكاتی سەربڕینی ئاژەڵ و پارچەكردنی گۆشت لە پێناو كەمكردنەوەی بەركەوتن و توش بوون بە نەخۆشی.

 _ گواستنەوەی گۆشت بەساردكەرەوە یان لەپلەی گەرمی (2-6) ئەنجام بدرێت .

_  بەكارهێنانی كیسی (نایلۆن) نوێ و ڕوون و بێ ڕەنگ لەكاتی دابەشكردنی گۆشت.

_  هەڵگرتنی گۆشت بۆ ماوەی 24 سەعات لەساردكەرەوە، پاشان بەكاربهێنرێت.

_  فڕێنەدانی پاشماوەی سەربڕین لە سەر شەقام و كۆلان و بازارەكان ........هتد.  لەبەرئەوە دەبێت گشت پاشماوەكانی سەربڕین لەكیسی نایلۆنی داخراو بكرێت فڕێ بدرێت لە شوێنی تایبەتی دیاریكراو لەلایەن سەربرخانەكان و دەزگا رەسمیيەكان.

PUKMEDIA