پلەی 8758 کارمەند و پلەداری پێشمەرگە بەرزکرایەوە

PUKMEDIA

لۆگۆی وەزارەتی پێشمەرگە

پلەی هەشت هەزار و 758 کارمەند و پلەداری پێشمەرگە بۆ خشتەی نەورۆزی 2026 بەرزکرایەوە و وەزیری پێشمەرگەش دووپاتی دەکاتەوە، کە ئەم پلەبەرزکردنەوەیە، مافێکی شایستە و یاسایی خۆیانە کە دەرەنجامی دڵسۆزی، ئەرککێشانی بەردەوامیان هاتۆتەدی.


شۆڕش ئیسماعیل وەزیری پێشمەرگەی هەرێمی کوردستان، لە پەیامێکیدا رایگەیاند: بە بۆنەی پلەبەرزکردنەوەی هەشت هەزار و 758 کارمەند و پلەداری وەزارەتی پێشمەرگە لە خشتەکانی نەورۆزی 2026، گەرمترین پیرۆزبایی لە کارمەندان و پلەدارانی وەزارەتی پێشمەرگە دەکەین.

وەزیری پێشمەرگە ئاماژەی بەوەشکردووە: ئەم پلەبەرزکردنەوەیە، مافێکی شایستە و یاسایی خۆیانە کە دەرەنجامی دڵسۆزی، ئەرککێشانی بەردەوامیانە لە پاراستنی خاک و نیشتمان و دەستکەوتەکانی گەلەکەمان.

دەشڵێت: ئێوە هەمیشە پارێزەری ئەم هەرێمە بوون و شایستەی هەموو ڕێز و پێزانینێکن.

شۆڕش ئیسماعیل وەزیری پێشمەرگەی هەرێمی کوردستان، لە کۆتایشدا، هیواخوازە پلە بەرزبوونەوەکە ببێتە پاڵنەرێکی بەهێزتر بۆ بەردەوامبوون لەسەر پەرەپێدانی زیاتری تواناکانیان لە پێناو پاراستنی ئارامی و سەقامگیریی کوردستان.

PUKMEDIA