سەردانەكەی زەیدی بۆ واشنتۆن ئامانج و بەربەستەكان

PUKMEDIA

بورهان شێخ رەئوف

مەبەستی سەرەكیی سەردانەكەی عەلی فالح زەیدی سەرۆك وەزیرانی عیراق بۆ واشنتۆن بۆ بەهێزكردنی پەیوەندیی ستراتیژیی نێوان عیراق و ئەمریكایە بە پلەی یەكەم و راكێشانی وەبەرهێنانی ئەمریكییە لە بواری نەوت و غاز و كارەبا، لە پاڵ ئیمزاكردنی یاداشتی لێكتێگەیشتن و رێككەوتنی ئابووری و وزە، هەروەها گفتوگۆیە لەسەر هاوكاریی سەربازی و پەرەپێدانی توانای سوپای عیراق، دۆزینەوەی رێگای نوێیە بۆ هەناردەكردنی نەوت بە جۆرێك كە تەنها پشت بە تەنگەی هورمز نەبەسترێت .

لە كاتێكدا بڕیارە لە مانگی ئەیلولی داهاتوودا، راوێژكارە سەربازییەكانی ئەمریكا ئەركەكانیان لە عیراق بە هەرێمی كوردستانیشەوە تەواوبێت و بكشێنەوە، حكومەتی عیراق خوازیارە پەیوەندیی سەربازی و ئاسایش بگۆڕێت بە ئاراستەی هاوبەشیی سیاسی و ئابووریی و وزە و تەكنۆلۆژیا و ژێرخان و هاریكاریی بانكی، وەبەرهێنان و رێخۆشكردن بۆ هاتنە ناوەوەی كۆمپانیا ئەمریكییەكانی بواری نەوت و غاز.

ئەگەرچی مانگی ئازاری 2026 كۆمیتەیەكی هەماهەنگی باڵای هاوبەش پێكهێنرا لەنێوان هەردوولادا وەكو چوارچێوەیەكی هاوبەشی ستراتیژی بۆ؛-

1.هەماهەنگی  بۆ بەگژداچوونەوەی تیرۆر و گرنتیكردنی بەكارنەهێنانی خاكی عیراق بۆ هێرشكردنە سەر هیچ وڵاتێك.

2. سەرلەنوێ‌ داڕشتنەوەی هاریكارییەكان لە بواری ئاسایش و پاڵپشتی هێزە چەكدارەكانی عیراق لەجیاتی هاوپەیمانیی نێودەوڵەتی .

بەڵام ئاڵەنگاری گەورەش لەبەردەم ئەم لێكتێگەیشتنانەدا هەیە:-

1.گوشاری ناوخۆیی، چونكە هەندێك گروپی چەكدار و تەنانەت سیاسییش  هەن، چاودێری دۆخەكە دەكەن بەوردی و ئەم هەوڵانە بەمانەوەی هێزەكانی ئەمریكا لێكدەدەنەوە.

2.لایەنی ئیقلیمی، ئاڵۆزیی نێوان ئەمریكا و ئێران سێبەری راستەوخۆی بەسەر دۆخەكەوە هەیە.

3.گوشارەكانی ئەمریكا بۆ كەمكردنەوەی كاریگەرییەكانی گروپە چەكدارەكان.

4.هەندێك كێشەی یاسایی و ئاسایش و بیرۆكراسی كە پێشتر وەبەرهێنەرانی ئەمریكی تووشی كێشە كردبوو .

ئەگەر ئەم سەردانە بە سەركەوتوویی كۆتایی پێ بێت، چاوەڕوان دەكرێت ئیمزاكردنی رێككەوتنی وزە لە بواری غاز و نەوت و كارەبا و هاتنە ناوەوەی كۆمپانیا ئەمریكییە گەورەكانی لێبكەوێتەوە، كە دەتوانێت هەلی كار دروست بكات بۆ هاووڵاتیانی عیراق و توانای عیراق زیاد بكات بۆ هەناردەكردنی نەوت بە رێگەی  جیاواز لە گەرووی هورمز، هاوكاریی زیاتر لە بواری ئاسایش و سەربازی بۆ جێبەجێكردنی كۆنترۆڵی دەوڵەت بەسەر چەكی میلیشیاكان و ئەو چەكەی لە دەرەوەی دەسەڵاتی دەوڵەتدایە.

كۆبوونەوەكانی وەفدی عیراق لە ئەمریكا، زۆر بابەتی هەستیار و پڕ بایەخ لەخۆدەگرێت، ئەگەر ئامانجەكانی سەربگرێت ئەوا ئایندەی عیراق دەگۆڕێت.

PUKMEDIA