قوباد تاڵەبانی بۆ مامۆستایان: پشتیوانی لە داوا رەواکانتان دەکەین

نوسینگەی رۆژنامەوانی قوباد تاڵەبانی

قوباد تاڵەبانی جێگری سەرۆکی حکومەتی هەرێمی کوردستان

قوباد تاڵەبانی جێگری سەرۆکی حکومەتی هەرێمی کوردستان، بەبۆنەی شەست و چوارەمین ساڵیادی دامەزراندنی یەکێتیی مامۆستایانی کوردستانەوە پەیامێکی پیرۆزبایی ئاڕاستەی مامۆستایان دەکات.

دەقی پەیامەکە:

بەڕێزان لە مەکتەبی سکرتارییەتی یەکێتیی مامۆستایانی کوردستان

بەبۆنەی شەست و چوارەمین ساڵیادی دامەزراندنی یەکێتیی مامۆستایانی کوردستانەوە، گەرمترین پیرۆزبایی لە ئێوەی بەڕێز و هەموو مامۆستایانی کوردستان دەکەین و بە ڕێز و شکۆوە یادی مامۆستایانی شەهید دەکەینەوە و سەری رێزیش لە ئاست خەمخۆری و دڵسۆزی مامۆستایانی کوردستان دادەنوێنین کە بە تایبەت لەم ساڵانەی دواییدا سەرباری هەموو کەموکوڕیی و گرفتەکان بەردەوام بوون لە راپەڕاندنی ئەرکە پیرۆزەکەیاندا.

لەم یادەدا پشتیوانی خۆمان بۆ هەموو داواکارییە رەواکانتان دووپات دەکەینەوە و دڵنیاشتان دەکەینەوە لە هیچ هەوڵێک بۆ جێبەجێکردنیان درێخی ناکەین، چوونکە پێمانوایە داواکارییەکانتان لە خەمی قوڵی ئێوەوە سەرچاوەی گرتووە بۆ باشترکردن و پێشخستنی کەرتی پەروەردە و گەرەنتیکردنی داهاتوویەکی باش بۆ نەوەکانی میللەتەکەمان. 

قوباد تاڵەبانی
جێگری سەرۆکی حکومەتی هەرێمی کوردستان

PUKMEDIA