پڕۆژەیەکی ستراتیژی رێگاوبان لە شارباژێڕ جێبەجێ دەکرێت

ڕێگاوبان و ئاوەدانکردنەوەی سلێمانی

کارکردن لە رێگاکە

پرۆژەیەکی ستراتیژی رێگاوبان لە شارباژێڕ جێبەجێ دەکرێت و بەهۆیەوە شاری سلێمانی بە ناوچەی پشدەرەوە دەبەسرێتەوە و نزیکەی 16 ملیار دیناری بۆ تەرخانکراوە و لە ئێستادا بەچڕی کاری تێدا دەکرێت.

بەڕێوبەرایەتی گشتی ڕێگاوبان و ئاوەدانکردنەوەو نیشتەجێکردنی سلێمانی، لە راگەیەندراوێکیدا، ئاماژەی بەوەکردووە: ئەمڕۆ 12ی5ی2026،محەمەد جەلیل بەڕێوەبەری گشتی ڕێگاوبان و ئاوەدانکردنەوەو نیشتەجێکردنی سلێمانی، لەشارباژێر پرۆژەی دروستکردن و قیرتاوکردنی ڕێگای (کونەماسی-دۆڵبێشک-قامیش-سەفرە-پردی وەیسە) ی بەسەر کردەوە.

راشیگەیاندووە: لەئێستادا بە چڕی کار لە پڕۆژەکەدا دەکرێت و 30% کارەکانی تەواو بووە ،کە کۆمپانیای هێما کاری جێبەجێکردنی پڕۆژەکە دەکات.

لە بارەی بڕی پارەی تەرخانکراو لەگەڵ ماوەی تەواو بوونی پڕۆژەکە، ڕێگاوبان و ئاوەدانکردنەوەو نیشتەجێکردنی سلێمانی، ئاشکرای کردووە: ماوەی جێبەجێکردنی پڕۆژەکە بەپێی گرێبەست 500 رۆژی ڕۆژژمێرییە و درێژی ڕێگاکە 30.5 کیلۆمەترە و گوژمەی پرۆژەکەش بریتی یە لە 15 ملیار و 846 ملیۆن و 160 هەزار دینار و لە رۆژی 26ی10ی 2025وە کارکردن تیایدا دەستی پێکردووە.

لە کۆتایشدا، رێگاوبانی سلێمانی ئاماژەی بە گرنگی پرۆژەکە کردووە و رایگەیاندووە: بەتەواوبونی ئەم پرۆژە ستراتیجیە شاری سلێمانی دەبەسترێتەوە بە ناوچەی پشدەرەوە و ڕێگاکە لە ڕووی گەشتیاری و کشتوکاڵییەوە سودێکی زۆر بە هاووڵاتیان و دانیشتوانی گوندەکانی ناوچەکە دەگەیەنێت.

PUKMEDIA