یەکێتی کێشەی مامۆستایانی خوێندنی کوردی لە خورماتوو چارەسەر دەکات

تایبەت

م. یاسین محەمەد ئەندامی ئەنجومەنی پارێزگا و بەڕێوەبەری گشتی پەروەردەی سەڵاحەدین

لە خورماتوو مامۆستایانی سەر بە هەرێمی کوردستان رێگەیان پێنادرێت چاودێری هۆڵەکانی تاقیکردنەوە بکەن، ئەندامێکی ئەنجومەنی پارێزگای سەڵاحەدین لە فراکسیۆنی یەکێتی رایدەگەیەنێت: کێشەکەی ئەو مامۆستایانە و شایستە داراییەکانیشتمان چارەسەر کردووە.

مامۆستا یاسین محەمەد ئەندامی ئەنجومەنی پارێزگای سەڵاحەدین لە فراکسیۆنی یەکێتی، بەمەبەستی چارەسەرکردنی کێشەی مامۆستایانی کوردی ئەوانەی سەر بە هەرێمن، سەردانی بەڕێوبەری گشتی پەروەردەی سەڵاحەدینی کرد، دواتریش دەرکەوت کێشەکە لە وەزارەتی پەروەردەی عیراقەوە چارەسەردەکرێت، بۆیە پەیوەندی بە مازن غەریب ئەندامی ئەنجومەنی نوێنەرانی عیراق لە فراکسیۆنی یەکێتی کرد و پەرلەمانتارەکەی یەکێتیش کێشەکەی چارەسەرکرد.

 لە بارەی  میکانیزمی چارەسەرکردنی کێشەکە، مامۆستا یاسین محەمەد ڕایگەیاند: داوامان کرد کە میکانیزمی دانانی مامۆستایانی خوێندنی کوردی خورماتوو وەکو پارێزگای کەرکوکی لێبکرێت، چونکە هەمان کێشەی خورماتوویان هەبوو.

 لە کۆتایشدا، رایگەیاند: کێشەی مامۆستاکان و شایستە دارایەکانیان چارەسەرکرا، بۆ ئەوەی وەکو چاودێر دابنرێن و شایستەکانیان پێبدرێت.


PUKMEDIA