قوباد تاڵەبانی: دەبێت یەکێتی شەراکەتی راستەقینەی لەحکومەتی داهاتوودا هەبێت

نوسینگەی رۆژنامەوانی قوباد تاڵەبانی

قوباد تاڵەبانی جێگری سەرۆکوەزیرانی حکومەتی هەرێمی کوردستان

قوباد تاڵەبانی رایدەگەیەنێت: یەکێتی بۆ دەستپێکردنەوەی گفتوگۆکانی پێکهێنانی حکومەت لەگەڵ پارتی ئامادەیە، بەو مەرجەی لە کابینەی داهاتوودا شەراکەتێکی ڕاستەقینەی هەبێت و حکومەتی داهاتوو بەبێ جیاوازی خزمەتی هەموو ناوچەکان بکات.

قوباد تاڵەبانی جێگری سەرۆکوەزیرانی حکومەتی هەرێمی کوردستان لە میانەی بەشداریکردنی لە مەراسیمی بەخشینی خەڵاتی رێزلێنان بە رۆژنامەنووسانی بوێر و پارێزەرانی حەقیقەت، لەکۆنگرەیەکی رۆژنامەوانیدا رایگەیاند: دڵگرانین پرۆسەی پێکهێنانی حکومەت درێژەی کێشا، ئێمە لە یەکەم رۆژەوە لەگەڵ ئەوە بووین بە زوویی حکومەت پێکبهێنرێت و ئێستاش هەمان باوەڕمان هەیە، کە پێویستە حکومەتێک پێکبهێنرێت لە بەرژەوەندی کۆمەڵانی خەڵکی کوردستان بێت و خزمەت بە هەموو ناوچەکانی هەرێم بکات بەبێ جیاوازی، هاوکات حکومەتێک بێت یەکێتی وەک هاوبەشێکی راستەقینە بێت تێیدا.

راشیگەیاند: ئێمە بۆ کۆبوونەوە لەگەڵ پارتی حازرین و هەرگیز نەمانهێشتووە دۆخە سیاسییەکە بە گشتی، ئەگەر لە بەرژەوەندیمان بێت یاخود نا کاریگەری بکاتە سەر بۆچوونمان بۆ پرۆسەی پێکهێنانی حکومەت و رێگایەکی راست و دروستمان هەبووە و داوای هاوبەشییەکی راستەقینەمان کردووە، پێم وایە گفتوگۆکان دەستپێبکەنەوە باشبێت و ئێمەش حازرین، ئەگەر بڕیاریشبێت هەڵبژاردن دووبارە بکرێتەوە یاخود کابینەی دەیەمی حکومەت پێکبهێنرێت هەر حازرین.

سەبارەت بە دیاریکردنی کاندید بۆ وەرگرتنی پۆستەکانی کابینەی نوێی حکومەتی عیراق، قوباد تاڵەبانی ئاماژەی بەوەکرد: لەوانەیە کاندیدمان بۆ وەرگرتنی پۆستەکانی حکومەت لە بەغداد دیاری کردبێت.

PUKMEDIA