عەلی زەیدی بۆ پێكهێنانی حكومەتی نوێی عیراق راسپێردرا

ميدياكان

عەلی زەیدی بۆ پێكهێنانی حكومەتی نوێی عیراق راسپێردرا

چوارچێوەی هەماهەنگی كاندیدكردنی عەلی زەیدی، بۆ پۆستی سەرۆكوەزیرانی عیراقی راگەیاندو ستایشی هەڵوێستی نوری مالیكی و محەمەد شیاع سوودانی دەكات بۆ كشانەوەیان لەكاندید بوون، هاوكات سەرۆك كۆماریش داوا لەهێزە سیاسییەكان دەكات پشتیوانی لەعەلی زەیدی بكەن و هەماهەنگ بن بۆ جێبەجێكردنی ئەم شایستە دەستووریی و نیشتمانییە.

ئەمشەو 27ی 4ی 2026، چوارچێوەی هەماهەنگی كاندیدكردنی عەلی زەیدی، بۆ پۆستی سەرۆكوەزیرانی عیراقی راگەیاند، چوارچێوەكەش لەڕاگەیەندراوێكدا كە كۆپییەكی دەست PUKMEDIA كەوتووە ئاماژەی بەوەكردووە: لە سەرەتای كۆبوونەوەكەدا، سەركردەكانی چوارچێوەی هەماهەنگی ستایشی كارەكانی حكومەتیان كرد بە سەرۆكایەتی محەمەد شیاع سودانی، سەرۆكوەزیران، لە ماوەی سێ ساڵ و نیوی رابردوودا، چونكە كارەكانی نیشتمانی و بەرپرسانە بوو لەڕوبەڕوبوونەوەی ئاڵنگارییە ئابووری و هەرێمی و نێودەوڵەتییەكاندا.

ئەوەشخراوەتەڕوو: سەركردەكانی چوارچێوەی هەماهەنگی دەستخۆشییان لەجێبەجێكردنی كارنامەی حكومەت كرد، بەتایبەتی لەبواری گەشەپێدان و گەڕاندنەوەی متمانەی هاووڵاتییانی عیراق بە سیستمی سیاسی و هەڵبژاردن، كە لەڕێی بەشداریی فراوان لەهەڵبژاردنە پەرلەمانییەكانی ئەم دواییەدا بە روونی دەركەوت.

چوارچێوەی هەماهەنگی لەڕاگەیەندراوەكەدا ئاماژەی بەوەشكردووە: هەڵوێستە مێژوویی و بەرپرسیارانەكانی هەریەكە لە نوری مالیكی، سەرۆكی هاوپەیمانیی دەوڵەتی یاسا و محەمەد شیاع سوودانی، سەرۆكی هاوپەیمانیی ئاوەدانكردنەوە و گەشەپێدان بەرز نرخێندران، بەهۆی كشانەوەیان لەكاندید بوون بۆ پۆستی سەرۆكوەزیران و پێكهێنانی حكومەتی داهاتووی عیراق.

راشیگەیاندووە: ئەم هەنگاوە دووپاتكردنەوەی پەرۆشیی ئەوانە بۆ پاراستنی بەرژەوەندییە باڵاكانی نیشتمان و ئاسانكارییە بۆ تێپەڕاندنی چەقبەستوویی سیاسی، هەروەها بۆ رەخساندنی دەرفەت لەبەردەم چوارچێوەی هاوئاهەنگی تاوەكو كاندیدێك هەڵبژێرێت كە مەرجە داواكراوەكانی تێدابێت بۆ وەرگرتنی پۆستی سەرۆكوەزیران و لەگەڵ پێداویستی و ئاڵنگارییەكانی ئەم قۆناغەدا بگونجێت.

لەڕاگەیەندراوەكەدا ئەوەشخراوەتەڕوو: دوای تاوتوێكردنی ناوی كاندیدەكان، عەلی زەیدی وەك كاندیدی فراكسیۆنی چوارچێوەی هەماهەنگی، وەكو گەورەترین فراكسیۆن لە ئەنجوومەنی نوێنەران، بۆ وەرگرتنی پۆستی سەرۆكایەتی ئەنجوومەنی وەزیران و پێكهێنانی حكومەتی داهاتوو هەڵبژێردرا.

هاوكات نزار ئامێدی، سەرۆككۆماری عیراق، لەپۆستێكدا لەتۆڕی كۆمەڵایەتی ئێكس رایگەیاند: بەڕێز عەلی زەیدی-مان راسپارد بۆ پێكهێنانی حكومەتی نوێ، هەروەها داوا لەهەموو هێزە سیاسییەكان دەكەین پشتیوانی لێبكەن و لەگەڵیدا هەماهەنگ بن بۆ جێبەجێكردنی ئەم شایستە دەستووریی و نیشتمانییە.

PUKMEDIA