ئەمریکا هۆشداری دەداتە هاووڵاتیانی لە عیراق و هەرێم

پەڕەی تایبەتی باڵیۆزخانەی ئەمریکا

باڵیۆزخانەی ئەمریکا لە بەغداد

باڵیۆزخانەی ئەمریکا لە بەغداد لە بەیاننامەیەکدا هۆشدارییەکی ئەمنیی بەپەلەی بڵاوکردەوە و داوا لە هاووڵاتیانی وڵاتەکەی دەکات بەهۆی مەترسیی هێرشی میلیشیاکان (وەک ئەوەی لە بەیاننامەکەدا هاتووە)، دەستبەجێ عیراق جێبهێڵن.

بەپێی بەیاننامەکەی باڵیۆزخانەی ئەمریکا بوونی پلانی میلیشیاکان بۆ ئەنجامدانی هێرش لە سەرانسەری عیراق و هەرێمی کوردستان مەترسیدارە و سەرەڕای کردنەوەی ئاسمانی وڵات بەڕوی گەشتەکاندا، مەترسیی مووشەک و درۆن لەسەر گەشتە بازرگانییەکان ماون.

هاوکات لەبەیاننامەکەدا داوا لە ئەمریکییەکان کراوە لە رێگەی خاڵە سنورییە وشکانییەکانەوە بەرەو وڵاتانی دراوسێ وەک (تورکیا، ئوردون، کوێت، سعوودیە) بڕۆن، ئەوەش ئاشکرا دەکەن کە تەواوی کارە کونسوڵییەکان و پێدانی ڤیزا راگیراون و تەنها هاوکاریی بەپەلە پێشکەش دەکرێن.

لەپەیامێکیشدا بۆ هاووڵاتیان داوا دەکەن لە بارەگای باڵیۆزخانە و کونسوڵخانەی هەولێر دوور بکەونەوە و تەنها لە ڕێگەی ئیمەیڵەوە پەیوەندی بکەن.

باڵیۆزخانەکە جەختی کردووەتەوە کە ئاستی مەترسی گەشتکردن بۆ عیراق لە پلەی چوارەمدایە و داوا دەکات هیچ کەسێک لەم کاتەدا سەردانی عیراق نەکات.

PUKMEDIA