مەكتەبی سیاسی بۆ سەرۆك كۆمار: سەرۆكایەتیت ببێتە چارەسەری كێشەكانی نێوان هەرێم و بەغداد

PUKMEDIA

یەكێتیی نیشتمانیی كوردستان

مەكتەبی سیاسی یەكێتیی نیشتمانیی كوردستان، بەبۆنەی هەڵبژاردنی نزار محەمەد سەعید ئامێدی، بەسەرۆك كۆماری عیراق، پەیامێكی بڵاوكردەوەو وێڕای پیرۆزبایی رایگەیاند: ئەركی سەرۆك كۆمار ئەركێكی سەنگین و قورسە و دڵنیاین بەڕێزتان كە خوێندكاری سەرۆك مام جەلال-ن، لەم ئەركەدا سەركەوتوودەبن و هیوادارین سەرۆكایەتیتان ببێتە چارەسەری  كێشەكانی نێوان هەرێم و بەغداد.

دەقی پەیامەكە:

براو هەڤاڵمان فەخامەتی سەرۆك كۆمار نزار محەمەد سەعید ئامێدی 

بەبۆنەی هەڵبژاردنتان وەك سەرۆك كۆماری عیراقی فیدڕاڵ، پیرۆزباییەكی گەرمتان ئاڕاستە دەكەین و هیوای سەركەوتنتان بۆ دەخوازین. 

ئەركی سەرۆك كۆماری ئەركێكی سەنگین و قورسە و دڵنیاین بەرێزتان كە خوێندكاری بە وەفای خوێندگەی سەركردەی كۆچكردوو سەرۆك مام جەلال و رێڕەوی نیشتمانی و دیموكراتی عیراقی دەستووری و فیدراڵن لەم ئەركەدا سەركەوتوودەبن و متمانەی ئەندامانی ئەنجومەنی نوێنەران دەپارێزن .

بەم بۆنەیەشەوە وێڕای پیرۆزبایی لەتیمی دانوستاندنمان بەسەرۆكایەتی هەڤاڵ بافڵ جەلال تاڵەبانی، سەرۆكی یەكێتیی نیشتمانیی كوردستان، كە لەگەڵ لایەنەكان هەوڵی چڕی گفتوگۆ و دانووستاندیان بۆ بردنەوەی  كاندیدی یەكێتی سەرخست، پیرۆزبایی لە پەرلەمانتان و هێز و لایەنە سیاسییەكانی وڵات دەكەین كە ئەم ئیستحقاقە دەستووریی و دیموكراتییەیان سەرخست، بەرەو ئەركەكانی داهاتووی پێكهێنانی حكومەت و دامەزراوەكانی. 

ئومێدەوارین ئەم قۆناغەی سەرۆكایەتی فەخامەتتان  ببێتە مایەی  كردنەوەی دەرگای  چارەسەری  كێشەكانی نێوان  هەرێمی كوردستان و حكومەتی  فیدراڵی  لەپێناو  پتەوكردنی گیانی  پێكەوەیی و لێتێگەیشتنی نێوان گشت لایەنەكان .

دووبارە پیرۆز بێت

مەكتەبی سیاسی 
یەكێتیی نیشتمانیی كوردستان

PUKMEDIA