لەكەركوك بە میكانیزمێكی جیاواز غازی ماڵان دابەش دەكرێت

PUKMEDIA

كەركوك

لەكەركوك بە میكانیزمێكی جیاواز غازی ماڵان دابەش دەكرێت و لەهەفتەی داهاتووشەوە دەبێت بە ئەلیكترۆنی، سەرۆكی لیژنەی خزمەتگوزارییەكانی ئەنجومەنی پارێزگاكەش دەڵێت: ئەم هەنگاوە دەبێتە ر‌ێگریی لەبەقاچاخ بردنی غاز و درووستبوونی قەیران.

د.ئەحمەد كەركوكی سەرۆكی لیژنەی خزمەتگوزارییەكان لە ئەنجومەنی پارێزگای كەركوك بە وێبسایتی رەسمی یەكێتیی نیشتمانیی كوردستان PUKMEDIA ی راگەیاند: لەئەمڕۆوە بۆ چەند ر‌ۆژێك بە میكانیزمێكی جیاواز غازی ماڵان دابەش دەكرێت، بەجۆرێك رۆژانە لە 20 گەڕ‌ەكدا 10 ئۆتۆمبێلی غاز سەردانی هەر گەڕ‌ەكێك دەكات.

راشیگەیاند: لەهەفتەی داهاتووەوە دابەشكردنی غازی ماڵان دەبێتە ئەلیكترۆنی وەكو نەوت، بەجۆرێك هەموو ماڵێكی كەركوكی مانگانە دوو بتڵ غازیان پێدەدرێت، ئەم هەنگاوەش دەبێتە ر‌ێگرییەكی باش لە بەقاچاخ بردنی غاز و درووستبوونی قەیران.

ئەوەشی خستەڕوو: خەڵك دڵنیا دەكەینەوە كە ئێمە بەمەبەستی چارەسەركردنی كێشەی كەمی غاز لەهەر گەڕ‌ەكێك و لەپێناو چەسپاندنی دادپەروەری لە دابەشكردندا بەردەوامین لەبەدواداچوونەكانمان.

PUKMEDIA