هاوخەمییەکان بۆ کۆچى دوایى رۆژنامەنووس خەڵات عومەر

خەڵات عومەر

خەڵات عومەر

نوسەر و رۆژنامەنووسى کوردستان "خەڵات عومەر" کوڕی نوسەر و شانۆکار و هونەرمەند مامۆستا عومەر عەلی ئەمین، برای "شەهید ئاوات" و هونەرمەندی شانۆکار خاتوو گەزیزە، کۆچی دوایی کرد، بەو هۆیەشەوە چەندین پرسەنامە و هاوخەمی ئاڕاستەی کەسوکار و هاوڕێ و هاوپیشەکانى کرا.

دەقى پرسەنامەى  قوباد تاڵەبانی: 

بەڕێزان خانەوادەی کۆچکردوو خەڵات عومەر 

زۆر بەداخەوە هەواڵى کۆچی دوایی (خەڵات عومەر)م بیست. 

کۆچکردوو نوسەر و توێژەرێکی بەئەزموون و رۆژنامەنوسێکی رۆشنفکر و بەئەمەکی کوردستان بوو، کۆچکردنی جێگەی داخی هەمووانە. 

بۆ ئەم کۆچە، هاوبەشی خەمی خانەوادە و خاتوو گەزیزە عومەر و هونەرمەندان و ئازیزانی کۆچکردووم و پرسە و سەرەخۆشیان لێ ئەکەم. 

خوای گەورە لەکۆچکردوو خۆش بێت و جێگەی بەهەشت بێت، سەبورى و دڵنەواییش بەهەموو لایەک ببەخشێت.

انا لله وانا اليه راجعون

قوباد تاڵەبانی
جێگری سەرۆکی ئەنجومەنی وەزیران

دەقى پرسەنامەى شاناز ئیبراهیم ئەحمەد: 

مەرگی ناوادەی نوسەر و رۆشنبیری گەورە خەڵات عومەر خەسارەتێکی گەورەیە بۆ نەتەوەکەمان. 

بە دڵێکی پڕ لەخەمەوە پرسە و سەرەخۆشیم ئاراستەی بنەماڵە بەڕێزەکەی و نوسەران و رۆشنبیرانی کوردستان ئەکەم.

کۆچکردوو رەخنەگر و نوسەرێکی بیرمەند و تێکۆشەر و نیشتمانپەروەرێکی گەورە بوو . 

لە دڵی ئێمەشدا جێگەیەکی تایبەتی هەبوو . خوالێخۆشبوو لەسەرەتای دامەزراندنی ناوەندی چاپەمەنی و راگەیاندنی خاکەوە ئەندامی دەستەی دامەزرێنەر بوو.

رۆحی شاد و جێگەی بەهەشتی بەرین بێت.

شاناز ئیبراهیم ئەحمەد

دەقى پرسەنامەى سەندیکای رۆژنامەنووسانی کوردستان: 

خەڵات عومەر عەلی ئەمین کۆچی دوایی کرد

بە خەمو پەژارەیەکی زۆرەوە ھەواڵی کۆچی دوایی ئەندامی کارای لقی سلێمانی سەندیکای رۆژنامەنووسانی کوردستان و رۆژنامەنووسی ناسراو و نوسەر و گۆشەنوسی ساڵانی نەوەدەکان و ساڵانی پێشوو خەڵات عومەر رادەگەیەنین..

نوسەرێکی ناودار و شیکەرەوەیەکی رۆژنامەی کوردستانی نوێ و بەڕێوەبەری پێشووتری رادیۆی دەنگی گەلی کوردستان بوو.

خەڵات نەوەی بنەماڵەیەکی ھونەرمەند و تێکۆشەری شاری سلێمانی بوو، کوڕی ھونەرمەندی ناودار عومەری علی امین و برای خاتوو گەزیزە عومەر بوو ، لێرەوە سەرەخۆشی لە سەرجەم رۆژنامەنووسان و نوسەران و بنەماڵە و خێزان و کەسوکار و دۆست و هاوڕێیانی دەکەین..

انا للە وانا الیە راجعون

 لقی سلێمانی
 سەندیکای رۆژنامەنووسانی کوردستان
17/1/2026

دەقى پرسەنامەى یەکێتی نووسەرانی کورد - لقی سلێمانی:
 
پرسەو سەرەخۆشی .. (کۆچێکی سپی و بێدەنگ) 

دڵگرانین بە کۆچی ناوەختەی نووسەری بەهەڵوێست و هاوڕێی ئازیزمان (خەڵات عومەر) و هاوبەشی ئەم خەمە سەختەی بنەماڵە بەڕێزەکەیانین .. گیانی بێگەردی هاوڕێمان ئارام و سەبووری بۆ ئازیزان ..

هەموو عەسرێك چاوەڕێی سەردانیی تۆ بووین 
تا کەمی خەمی خۆمان و خۆت و خەڵکی 
بدەین بەدم دوو نەفەسی جگەرەیەکی لەخۆمان بێزارترەوە .. 
بنوو هاوڕێ .. ئەم ژیانە هیچێکی وای تیانەمەوە
نەماندی بێ و شایستە بێ بەوەی زیاتر چاوەڕێی کەین !

یەکێتیی نووسەرانی کورد - لقی سلێمانی

PUKMEDIA