یه‌ك ملیۆن به‌رمیل نه‌وتی هه‌رێم به‌ ئه‌وروپا فرۆشرا

PUKMEDIA

بەندەرى جەیهان

ئەمڕۆ دووشەممە 6ى10ى2025  یەک ملیۆن بەرمیل نەوتی هەرێمی کوردستان لە رێگەی کەشتییەوە بەرەو بازاڕەکانی ئەورووپا رۆیشت و فرۆشرا.

بەپێی ئەو نرخەی دیاریکراوە بۆ فرۆشتنی نەوتی کوردستان کە 65 دۆلارە، بەهای ئەو نەوتەی ئەمڕۆ فرۆشراوە 65 ملیۆن دۆلارە.

رۆژى شەممە 4ی10ی2025، حەیان عەبدولغەنی وەزیری نەوتی عیراق رایگەیاندبوو، تا ئێستا زیاتر لە یەک ملیۆن بەرمیل نەوت لە هەرێمی کوردستان وەرگیراوە، دووپاتیشی کردەوە یەکەم کەشتی نەوت هەڵگر بەندەری جیهانی جێهێشتووە.

وەزیری نەوتی عیراق ئەوەشى راگەیاندبوو: چەند رۆژێک لەمەوبەر، هەناردەکردنەوەی نەوت لە هەرێمی کوردستانەوە بۆ بەندەری جەیهان لە رێگەی بۆری عیراق- تورکیا دەستیپێکردەوە، کە بۆ ماوەی زیاتر لە دوو ساڵ بوو راگیرابوو.

ئاماژەی بەوەشکردبوو: حکومەتی فیدراڵ نەوتی بەرهەمهێنراو لە هەرێم وەردەگرێت و بەرپرسیارە لە هەناردەکردنی بۆ دەرەوەی عیراق.

پەیوەست بەو بڕەشی کە وەریانگرتووە، وەزیری نەوت ئاشکرای کردبوو: بڕی نەوتی وەرگیراو تا ئێستا گەیشتووەتە زیاتر لە یەک ملیۆن بەرمیل، ئەوەشی خستەڕوو، لەئێستادا 650 هەزار بەرمیل نەوتی هەرێمی کوردستان بارکراوە بۆ فرۆشتن و ئاڕاستەی ئەو شوێنانەکراوە کە گرێبەستیان لەگەڵ ئەنجامدراوە.

ئەمەش لەکاتێکدایە، رۆژی شەممە 27ی9ی2025 وه‌زاره‌تی نه‌وتی عیراق ده‌ستپێكردنه‌وه‌ی هه‌نارده‌ی نه‌وتی هه‌رێمی كوردستانی راگه‌یاند و ئاشكرایكرد: "به‌بێ كێشه‌ پڕ‌ۆسه‌كه‌ ده‌ستیپێكرده‌وه‌"، پڕ‌ۆسه‌ی هه‌نارده‌كردنه‌وه‌ی نه‌وتی خاوی هه‌رێم له‌ ر‌ێگه‌ی هێڵی عیراق – توركیا ده‌ستیپێكرده‌وه ‌و کە بڕی 190هه‌زار به‌رمیلی رۆژانەی له‌ ر‌ێگه‌ی بۆرییه‌وه‌ ره‌وانه‌ی به‌نده‌ری جه‌یهان كرا.

PUKMEDIA