یەكێتی: ئەو لایەنەی داوای هەڵبژاردن دەكات لەگەڵ دواخستنە

.

یەكێتی رایدەگەیەنێت هەڵبژاردنی پەرلەمانی كوردستان لە30ی ئەیلول دەكرێت و دواناخرێت، ئەو لایەنەشی باسی دواخستنی دەكات خۆی دەیەوێت هەڵبژاردنەكە دوابخرێت.

سەعدی ئەحمەد پیرە وتەبێژی رەسمی یەكتێی نیشتمانیی كوردستان لەكۆنگرەیەكی رۆژنامەوانیدا رایگەیاند: تا ئەم چركەیە هەڵبژاردنی پەرلەمانی كوردستان لە  30 ئەیلولی 2018 دەكرێت و دواناخرێت و یەكێتیش هیچ بەرنامەیەكی بۆ دواخستنی كاتی هەڵبژاردن نیەو پێشنیاری ئەو بابەتەشی نەكردوە.

لەبارەی ئەو دەنگۆیانەی باسی دواخستنی هەڵبژاردن دەكەن وتی:  ئەگەر یەكێتی بیەوێت هەڵبژاردن دوابخرێت ئەوا خۆی رایدەگەیەنێت، بەڵام ئەو لایەنەی بەدەنگێكی بڵندتر باسی دواخستنی دەكات ئەو لایەنە خۆی دەیەوێت هەڵبژاردن دوابخرێت.

وتەبێژی یەكێتی وتیشی:  ئەو لایانەی دەیانەوێت هەڵبژاردن دوابخرێت دەتوانن لەگەڵ یەكێتی و پارتی قسە بكەن و داواكە بخەنە بەردەم حكومەت، بەڵام تائێستا هیچ بەرنامەیەك بۆ دواخستنی هەڵبژاردن لەئارا نیە، ئەگەر شتێكی لەو شێوەیەش هەبێت قسەی خۆمان دەكەین.

PUKmedia تایبەت