سلێمانی.. شه‌هیدكردنی رۆژنامه‌نووسه‌كه‌ی دهۆك ئیدانه‌ ده‌كرێت

.

ئه‌مڕۆ 14-8-2016 رۆژنامه‌نووسان و چالاكوانن له‌شاری سلێمانی گردبونه‌یه‌ك بۆ رووداوی شه‌هید كردنی رۆژنامه‌نووس ویداد حسێن ئه‌نجامده‌ده‌ن.

به‌پێی زانیاریه‌كانی PUKmedia له‌و گردبونه‌وه‌یه‌دا رۆژنامه‌نوسان و چالاكوانان داوای به‌ده‌سته‌وه‌دانی بكوژی رۆژنامه‌نوس ویداد له‌ هێزه‌ ئه‌منیه‌كانی دهۆك ده‌كه‌ن و داواش ده‌كه‌ن هه‌رچی زوه‌ بۆ رای گشتی رونكردنه‌وه‌ بده‌ن.

ئیوارەی دوێنێش دوای كوژرانی رۆژنامەنوسەكەی شاری دهۆك، هەر پێنج فراكسیۆنی (یەكێتی،  گۆڕان، یەكگرتوو، كۆمەڵ، بزوتنەوە) لە راگەیەنراوێكدا ئیدانەی ئەو كردەوەیان كردو داوایان كرد ئەنجامدەری ئەو كردەوەیە سزا بدرێن، ده‌سته‌ی سه‌ربه‌خۆی مافی مرۆڤيش له‌هه‌رێمی كوردستان وێڕای ئیدانه‌كردنی ئه‌و تاوانه‌، داوایكرد، تاوانبارانی ئه‌و تاوانه‌ بدۆزرێنه‌وه‌ و بدرێنه‌ دادگا.

هاوكات له‌راگه‌یه‌نراوێكدا كه‌ كۆپییه‌كی بۆ PUKmedia نێردراوه‌، لیژنه‌ی داكۆكی له‌ ئازادی رۆژنامه‌نووسی و مافی رۆژنامه‌نووسان له‌ كوردستان ئیدانه‌ی تیرۆركردنی رۆژنامه‌نووسه‌كه‌ی دهۆك ده‌كات و داوا له‌ حكومه‌تی هه‌رێمی كوردستان و وه‌زاره‌تی ناوخۆو ده‌زگای ئاسایشی هه‌رێم و پۆلیس ده‌كه‌ین، تاوانباران بدۆزنه‌وه‌و ته‌سلیم به‌دادگای بكه‌ن.

جێی ئاماژه‌یه‌، له‌هه‌ردوو شاری هه‌ولێر و كه‌ركوكیش گردبونه‌وه‌ بۆ ئه‌و مه‌به‌سته‌ سازده‌كرێت، به‌ڵام هیچ گردبونه‌وه‌یه‌ك له‌شاری دهۆك رێكنه‌خراوه‌.

شایه‌نی باسه‌، دوێنێ له‌لایه‌ن كه‌سێكی نه‌ناسراوه‌وه‌ له‌شاری دهۆك په‌یامنێری ئاژانسی رۆژنیوز ویداد حسێن عه‌لی رفێندراو دواتر به‌برینداری دۆزرایه‌وه‌و به‌هۆی سه‌ختی برینه‌كه‌یه‌وه‌ به‌ر له‌گه‌یاندنی بۆ نه‌خۆشخانه‌ گیانیله‌ده‌ستدا.

PUKmedia هاژه‌ باست