پێنج فراكسیۆنه‌كه‌: بكوژانی رۆژنامه‌نووسه‌كه‌ی دهۆك سزابدرێن

.

پێنج فراكسیۆنی‌ په‌رله‌مانی‌ كوردستان: بكوژانی رۆژنامه‌نووسه‌كه‌ی دهۆك سزابدرێن

ئه‌مڕۆ 13-8-2016 فراكسیۆنه‌كانی‌ یه‌كێتیی نیشتمانیی كوردستان، گۆڕان، یه‌كگرتوو، كۆمه‌ڵ و بزووتنه‌وه‌ له‌ په‌رله‌مانی‌ كوردستان راگه‌یه‌نراوێكی‌ هاوبه‌شیان بڵاوكرده‌وه‌، كه‌ تێیدا كوژرانی‌ رۆژنامه‌نووسه‌كه‌ی ئاژانسی‌ هه‌واڵی‌ رۆژ نیوز كه‌ ئه‌مڕۆ له‌ دهۆك كوژرا ئیدانه‌ ده‌كه‌ن و داواكارن كه‌ ئه‌نجامده‌رانی ئه‌و كرده‌وه‌یه‌ سزابدرێن.

له‌ به‌شێكی راگه‌یه‌نراوه‌كه‌دا هاتووه‌: ئێمه‌ له‌ فراكسیۆنه‌كانی (یه‌كێتی، گۆڕان، یه‌كگرتوو، كۆمه‌ڵ و بزوتنه‌وه‌) به‌توندی ئیدانه‌ی تیرۆركردنی رۆژنامه‌نووس (وه‌دات حسێن عه‌لی) و سه‌رجه‌م ئه‌و پێشێلكارییه‌كانی مافی مرۆڤ و رۆژنامه‌نووسان ده‌كه‌ین.. ئه‌م رووداوه‌ راستییه‌كمان پیشان ده‌دات، كه‌ ئازادییه‌كان به‌گشتی و ئازادی راده‌ربڕین به‌تایبه‌تی له‌ژێر هه‌ڕه‌شه‌ی جددیدان.

هه‌ر له‌ راگه‌یه‌نراوه‌كه‌دا هاتووه‌: ئه‌رك و به‌رپرسیارێتی داموده‌زگا په‌یوه‌ندیداره‌كانی حكومه‌ت پاراستنی سه‌رو ماڵ و شكۆو ئازادیی هه‌موو هاووڵاتیانه‌و پێویسته‌ له‌ئاست ئه‌م تاوانانه‌دا به‌ شێوه‌یه‌كی پیشه‌ییانه‌و دوور له‌هه‌ر ده‌ستێوه‌ردانێكی حزبی و سیاسی كاری خۆیان بكه‌ن و سه‌روه‌ری یاسا به‌ به‌رزی رابگرن.

له‌ كۆتاییشدا ئاماژه‌یان به‌وه‌ كردووه‌: داوای لێكۆڵینه‌وه‌ی ورد له‌م كه‌یسه‌ ده‌كه‌ین و پێویسته‌ بكه‌رانی ئه‌م تیرۆرو تاوانه‌ بدۆزرێنه‌وه‌و به‌سزای یاسایی خۆیان بگه‌ن.

PUKmedia تایبه‌ت