ده‌سته‌ی مافی مرۆڤ: بكوژانی رۆژنامه‌نووسه‌كه‌ی دهۆك بدرێنه‌ دادگا

.

به‌بۆنه‌ كوژرانی رۆژنامه‌نووس وه‌دات حسێن، ده‌سته‌ی سه‌ربه‌خۆی مافی مرۆڤ له‌هه‌رێمی كوردستان وێڕای ئیدانه‌كردنی ئه‌و تاوانه‌، داوا ده‌كات تاوانبارانی ئه‌و تاوانه‌ بدۆزرێنه‌وه‌ و بدرێنه‌ دادگا.

ئه‌مه‌ش ده‌قی به‌یاننامه‌كه‌ی ده‌سته‌ی سه‌ربه‌خۆی مافی مرۆڤ له‌ هه‌رێمی كوردستان


ده‌سته‌ی سه‌ربه‌خۆی مافی مرۆڤ، رفاندن و كوشتنی رۆژنامه‌نوس وه‌دات حسێن ئیدانه‌ ده‌كه‌ین و به‌ تاوانێكی گه‌وره‌ی له‌قه‌ڵه‌م ده‌ده‌ین به‌رامبه‌ر پیشه‌ی رۆژنامه‌وانی .

به‌داخه‌وه‌ ئه‌مڕۆ له‌شاری دهۆك رۆژنامه‌نوس ( ویداد حسێن ) دوای رفاندن و ونبونی دواتر به‌ كوژراوی دۆزراوه‌ته‌وه‌ كه‌ شوێنی ئه‌شكه‌نجه‌ی به‌ جه‌سته‌ی دیاربوه‌ ، ئێمه‌ له‌ده‌سته‌ی سه‌ربه‌خۆی مافی مرۆڤ وێڕای ئه‌وه‌ی ئیدانه‌ی رفاندن و كوشتنی رۆژنامه‌نوسه‌كه‌ ده‌كه‌ین و به‌تاوانێكی گه‌وره‌ی له‌قه‌ڵه‌م ده‌ده‌ین به‌رامبه‌ر پیشه‌ی رۆژنامه‌وانی و هه‌موانی نیگه‌ران كرد.

ده‌سته‌ی سه‌ربه‌خۆی مافی مرۆڤ داوا ده‌كه‌ین هه‌رچی زووه‌ ده‌زگا ئه‌منیه‌كان لێكۆڵینه‌وه‌ی ورد له‌ رووداوه‌كه‌و چۆنیه‌تی و جۆری رفاندن و كوشتنه‌كه‌ی بكه‌ن و بكه‌ران و تاوانباران بدۆزنه‌وه‌و ڕاده‌ستی دادگا بكرێن و دواتریش بۆ ڕای گشتی بڵاو بكه‌نه‌وه‌.

لای خۆشمانه‌وه‌ وه‌ك ئه‌ركی خۆمان له‌ چاودێری كردن و داكۆكی كردن له‌ ئازادی ڕاده‌ربرین و رۆژنامه‌نوسان ، له‌نزیكه‌وه‌ به‌دواداچون و چاودێری ئه‌و كه‌یسه‌ ده‌كه‌ین و له‌گه‌ڵ لایه‌نه‌ په‌یوه‌ندیداره‌كان له‌سه‌ر خه‌ت ده‌بین و چاودێری قۆناغه‌كانی لێكۆلینه‌وه‌ ده‌كه‌ین.

ده‌سته‌ی سه‌ربه‌خۆی مافی مرۆڤ له‌هه‌رێمی كوردستان

14 ی ئابی 2016

PUKmedia