شوێنه‌واره‌كانی عیراق ده‌خرێنه‌ لیستی یونسكۆ

.

سه‌رۆك مه‌عسوم پیرۆزبایی له‌عیراقییه‌كان ده‌كات به‌بۆنه‌ی دانانی دۆسیه‌ی هۆڕو ناوچه‌ شوێنه‌وارییه‌كانی عیراق له‌لیستی یونسكۆ بۆ كه‌له‌پوری جیهانی

د.فوئاد مه‌عسوم سه‌رۆك كۆماری عیراق ئه‌مڕۆ 17-7-2016 په‌یامێكی پیرۆزبایی ئاڕاسته‌ی گه‌لی عیراق كرد به‌بۆنه‌ی ئه‌وه‌ی كه‌ كۆمه‌ڵی نێوده‌وڵه‌تی دۆسیه‌ی هۆڕو ناوچه‌ شوێنه‌وارییه‌كانی له‌عیراق خسته‌ ریزی لیستی یونسكۆ بۆ كه‌له‌پوری جیهانی، سوپاسگوزاری ده‌ربڕی بۆ ته‌واوی سه‌رۆكی ده‌وڵه‌تانی دۆست كه‌ ده‌نگیاندا بۆ ئه‌م بڕیاره‌، ستایشی هه‌وڵی پڕ به‌رهه‌می وه‌فدی به‌شداربووی عیراقی كرد له‌كۆبونه‌وه‌ی خولی چله‌مینی "یۆنسكۆ" له‌ئه‌سته‌نبوڵ، هاوكات ته‌له‌فۆنیشی كرد بۆ ئه‌ندامانی وه‌فدی عیراق و پیرۆزبایی ئه‌م ده‌ستكه‌وته‌ گه‌وره‌ مێژووییه‌ی عیراقی لێكردن.

له‌په‌یامه‌كه‌ی سه‌رۆك كۆماردا هاتووه‌:
"پیرۆزبایی له‌گه‌لی عیراقی به‌ڕێز ده‌كه‌ین بۆ بڕیاری رێكخراوی نه‌ته‌وه‌ یه‌كگرتووه‌كان بۆ په‌روه‌رده‌و زانست و رووناكبیری (یونسكۆ) كه‌ دۆسیه‌ی هۆڕه‌كانی عیراقی خستووه‌ته‌ ریزی لیستی یونسكۆ بۆ كه‌له‌پوری جیهانی. هاوكات به‌تایبه‌تی ده‌ستخۆشی ده‌كه‌ین به‌هه‌وڵی پڕ به‌رهه‌می وه‌فدی به‌شداربووی عیراق له‌كۆبونه‌وه‌كانی خولی چله‌مینی یونسكۆ له‌ ئه‌سته‌نبوڵ كه‌ یارمه‌تیده‌ری به‌دیهێنانی ئه‌م ده‌ستكه‌وته‌ مێژووییه‌ بوو بۆ وڵاته‌كه‌مان.

ده‌ستخۆشی له‌ته‌واوی دامه‌زراوه‌ ره‌سمی و ناڕه‌سمییه‌كان و كه‌سایه‌تی و پسپۆڕانی عیراقی و دۆست ده‌كه‌ین كه‌ پاڵپشتی ده‌ركردنی ئه‌م بڕیاره‌ بوون، سوپاسی هه‌موو ئه‌و ده‌وڵه‌ته‌ دۆستانه‌و دامه‌زراوه‌ نێوده‌وڵه‌تیانه‌ش ده‌كه‌ین له‌ڕیزی پێشه‌وه‌یان پرۆگرامی په‌ره‌پێدانی نه‌ته‌وه‌ یه‌كگرتووه‌كان و رێكخراوی په‌روه‌رده‌و زانست و رووناكبیریی (یونسكۆ) بۆ هاریكاری خێراو كاریگه‌ریان له‌م بواره‌دا.

له‌م بۆنه‌یه‌شدا پێگه‌ی به‌رزی گه‌له‌كه‌مان دووپاتده‌كه‌ینه‌وه‌ كه‌ به‌درێژایی مێژوو به‌شداربووه‌ له‌ده‌وڵه‌مه‌ند كردن و به‌رده‌وامیشه‌ له‌ده‌وڵه‌مه‌ند كردنی شارستانی و كه‌لتوری ناوچه‌كه‌و مرۆڤایه‌تی، داوای سه‌ركه‌وتنی گه‌وره‌ ده‌كه‌ین بۆ ئه‌م پرۆژه‌ نیشتمانییه‌ گه‌وره‌یه‌".

PUKmedia تایبه‌ت