به‌عشیقه‌.. داعش شوێنه‌وارێكی سه‌رده‌می ئاشورییه‌كان وێرانده‌كات

سیانزه‌یه‌م پایته‌ختی ئیمبراتۆرییه‌تی ئاشوری بووه‌

تیرۆرستانی داعش له‌ ناحیه‌ی به‌عشیقه‌ی سه‌ربه‌ پارێزگای موسڵ، ناوچه‌ی شوێنه‌واری گرنگی خورسیباد- یان وێرانكرد.

سه‌رچاوه‌یه‌كی ئاگادار له‌ موسڵ ئه‌مڕۆ 8-3-2015، به‌ PUKmedia ی راگه‌یاند: تیرۆرستانی داعش دوو رۆژه‌ خه‌ریكی تێكدان و وێران كردنی ناوچه‌ی خورسیباد-ی شوێنه‌واری گرنگی ناوچه‌كه‌ن كه‌ ده‌كه‌وێته‌ 5 كیلۆمه‌تر له‌باكوری سه‌نته‌ری شاری موسڵ و سه‌ربه‌ ناحیه‌ی به‌عشیقه‌یه‌.

ئه‌و سه‌رچاوه‌یه‌ وتیشی: شوێنه‌واری خورسیباد چه‌ندین مه‌زارگه‌و  شوێنه‌واری دێرین له‌ خۆده‌گرێت و مێژووه‌كه‌ی ده‌گه‌ڕێته‌وه‌ بۆ سه‌رده‌می ئاشورییه‌كان و به‌پێی سه‌رچاوه‌كانی مێژوو، سیانزه‌یه‌م پایته‌ختی ئیمبراتۆرییه‌تی ئاشوری بووه‌ له‌ ناوچه‌كه‌دا و مێژووی دامه‌زراندنی ده‌گه‌ڕێته‌وه‌ بۆ سه‌رده‌می پادشا (سه‌رجۆن)ی سێیه‌م.

ئه‌و سه‌رچاوه‌یه‌ ئاماژه‌ی به‌وه‌شدا، تیرۆرستانی داعش پارچه‌ ئاسه‌واره‌ بچوكه‌كان ده‌به‌ن و ده‌یفرۆشنه‌وه‌، شوێنه‌واره‌ گه‌وره‌كانیش وه‌ك دیوارو پایه‌و بیناو كۆڵانه‌كانی ناوچه‌ شوێنه‌وارییه‌كه‌ ده‌ته‌قێننه‌وه‌و به‌شۆفڵ ده‌یروخێنن.

جێی یاسه‌ تیرۆرستانی داعش هه‌رله‌ سه‌ره‌تای داگیركردنی موسڵ، كه‌وتنه‌ وێرانكردن و به‌تاڵان بردنی ناوچه‌ شوێنه‌وارییه‌كانی ئه‌و ناوچه‌یه‌، وێرانكردنی خورسیباد-یش یه‌كێكه‌ له‌و وێرانكارییانه‌ی تیرۆرستانی داعش له‌ ناوچه‌كه‌دا كه‌ زیانێكی زۆر گه‌وره‌ به‌ عیراق ده‌گه‌یه‌نێت.

PUKmedia زانیار مه‌جید