لەسەر داوای پەرلەمانتارێکی یەکێتی بەڕێوەبەرایەتی پاسپۆرت لە خانەقین دەکرێتەوە

الجزيرة نت

خانەقین

پاش هەوڵە بەردەوامەکانی ئەندامێکی فراکسیۆنی یەکێتی لە ئەنجومەنی نوێنەرانی عیراق، دواجار رەزامەندی وەزیری ناوخۆ و بەڕێوەبەرایەتی گشتی رەگەزنامە و پاسپۆرتی عیراق درا بۆ کردنەوەی بەڕێوەبەرایەتی پاسپۆرت لە خانەقین.

لەو بارەیەوە سروە محەمەد ئەندامی فراکسیۆنی یەکێتی لە ئەنجومەنی نوێنەرانی عیراق تایبەت بە PUKMEDIA ی راگەیاند: داواکارییەکی زۆرمان لە خانەقینەوە بەدەست گەیشتبوو سەبارەت بە کردنەوەی بەڕێوەبەرایەتی پاسپۆرت لە قەزاکە، لەو چوارچێوەیەشدا بەرەسمی داوام لە بەڕێوەبەرایەتی گشتی رەگەزنامە و پاسپۆرتی عیراق کرد کە هاوکارمان بن بۆ کردنەوەی ئەو بەرێوەبەرایەتییە.

وتیشی: دوای هەوڵ و ماندوبونێکی زۆر دواجار رەزامەندی وەزیری ناوخۆ و بەڕێوەبەرایەتی گشتی رەگەزنامە و پاسپۆرتی عیراقم وەرگرت بۆ کردنەوەی بەڕێوەبەرایەتی پاسپۆرت لە خانەقین، کەلە ئێستادا بیناکەی ئامادەیە و لەهەوڵداین ببەسترێتەوە بە پاسپۆرتی بەغدادەوە، چاوەڕوانیش دەکەین لە نزیکترین کاتدا ئەو بەڕێوەبەرایەتییە بکرێتەوە.

ئاماژەی بەوەشکرد: بە کردنەوەی بەڕێوەبەرایەتییەکە خزمەتێکی زۆر بە دانیشوانی خانەقین و دەوروبەری دەگەیەندرێت و چیتر پێویست ناکات خەڵکی خانەقین بچنە دیالە بۆ مامەڵەی پاسپۆرت، ئەمەش هەوڵێکی دیکەی رابردوومان بوو، کەلە پێناو خەڵکی خۆشەویستی خانەقین بە ئەنجاممان گەیاندووە.

PUKMEDIA