ئەمڕۆ لەعیراق و سبەی لەهەرێم تاقیكردنەوەی پۆلی 12 دەستپێدەكات

ميدياكان

تاقیكردنەوەی خوێندكاران

بەبەشداری زیاتر لە 749 هەزار خوێندكار، تاقیكردنەوە گشتییەكانی پۆلی 12  ی ئامادەیی بۆ ساڵی خوێندنی 2025-2026 لە عیراق دەستیپێكرد و سبەی لەهەرێمیش زیاتر لە 117 هەزار خوێندكار بەشداریی تاقیكردنەوە گشتییەكانی پۆلی 12  دەكەن.

ئەمڕۆ شەممە 13ی 6ی 2026، بەبەشداری 749 هەزار و 454 خوێندكار، خولی یەكەمی تاقیكردنەوە گشتییەكانی قۆناغی 12 ی ئامادەیی دەستیپێكرد كە بەسەر چوار هەزار و 278 ناوەندی تاقیكردنەوەدا دابەشبوون.

هاوكات ژمارەی خوێندكارانی پیشەیی 87 هەزار و 134  خوێندكارن، كە بەسەر 807 ناوەندی تاقیكردنەوەدا دابەشكراون و كۆی گشتی ناوەندەكانی تاقیكردنەوەش پێنج هەزار و 85 ناوەندە.

لەلایەكی دیكەوە، وەزارەتی پەروەردەی حكومەتی هەرێمی كوردستان رایگەیاندووە: رۆژی یەك شەممە 14ی 6ی 2026، تاقیكردنەوەكانی خولی یەكەمی قۆناغی 12ی ئامادەیی لەهەرێمی كوردستان دەستپێدەكات و 117 هەزار و 142 خوێندكار بەشداری تێدا دەكەن.

راشیگەیاندووە: بۆ ئەمساڵی خوێندنی 2025-2026 كۆی گشتی 117 هەزار و 142 خوێندكار لە هەموو پارێزگا و ئیدارە سەربەخۆكانی هەرێمی كوردستان مافی بەشداریكردنیان هەیە و لەو ژمارەیەش 88 هەزار و 116 خوێندكار لە بەشی زانستی، 26 هەزار و 431 خوێندكار لە بەشی وێژەیی و دوو هەزار و 595 خوێندكاریش لە بەشی پیشەیین، كە تاقیكردنەوەكانیان بەسەر دوو هەزار و سێ هۆڵدا دابەشكراون.

PUKMEDIA