سێ بازرگانی ماددەی هۆشبەر دەستگیرکران و دەستبەسەر 12 کیلۆگرام ماددەی هۆشبەردا گیرا

راگەیاندنى دەزگای ئاسایشی هەرێم

وێنەیەکى دەستگیرکراوان و مادە دەستبەسەرداگیراوەکان

دەزگای ئاسایشی هەرێم، دەستگیرکردنی سێ بازرگانی ماددەی هۆشبەر رادەگەیەنێت و دەستبەسەر بڕی 12 کیلۆگرام ماددەی هۆشبەر لە جۆری ماریوانەدا دەگرێت.

لە راگەیەندراوێکدا ئاماژە بە ئەوە کراوە: بەڕێوەبەرایەتی ئاسایشی گشتی سلێمانی، بەڕێوەبەرایەتی نەهێشتنی ماددەهۆشبەرەکان بەهەماهەنگی بەڕێوەبەرایەتی ئاسایشی گشتی هەولێر، بەڕێوەبەرایەتی نەهێشتنی ماددە هۆشبەرەکان و بەڕێوەبەرایەتی ماددە هۆشبەرەکانی حکومەتی عیراقی فیدراڵ، لەدوو چالاکییدا، توانیان دەستبەسەر بڕی (12)کیلۆگرام ماددەی هۆشبەر لە جۆری ماریوانە بگرن و (3)بازرگانی ماددەی هۆشبەر کە خاوەن رەگەزنامەی بیانین لە سنووری سلێمانی دەستگیربکەن.

ئەوە روونکراوەتەوە: چالاکی یەکەم، لە بەروارى 21ى5ى2026 لەدوای بەدواداچوون و ئەنجامدانی لێکۆڵینەوەی ورد توانرا تۆمەتبارێکی بیانی لە شاری سلێمانی دەستگیربکرێت و دەستبەسەربڕی (5.200)پێنج کیلۆ و دوو سەد گرام ماددەی هۆشبەر لە جۆری ماریوانە بگرن و لەدوای لێکۆڵینەوەکان دەردەکەوێت تۆمەتبار بڕی(5.500)پێنج کیلۆ و پێنج سەد گرام ماددەی هۆشبەری ماریوانەی لە ماڵەکەی خۆی لە شارۆچکەی حاجی ئۆمەران شاردوەتەوە، دەستبەجێ پەیوەندی لەگەڵ بەڕێوەبەرایەتی ئاسایشی گشتی هەولێر ئەنجام دەدرێت و دەستبەسەر ماددە شاراوەکەدا دەگیرێت، تۆمەتبار بڕی(10.700)دە کیلۆ و حەوت سەد گرام ماددەی هۆشبەری هێناوەتە هەرێمی کوردستان.

ئەوەش خراوەتەڕوو: چالاکی دووەم لە بەروارى 21ى5ى2026 بەڕێوەبەرایەتی نەهێشتنی ماددەهۆشبەرەکان و بەڕێوەبەرایەتی ئاسایشی بازگەکان، لە سنووری سلێمانی توانیان دوو تۆمەتباری بیانی دەستگیربکەن و دەستبەسەر بڕی(1.300)یەک کیلۆ و سێ سەد گرام ماددەی هۆشبەر لە جۆری ماریوانە بگرن.

ئاماژە بە ئەوەش دراوە: لەئێستادا تۆمەتباران بە ماددەی 25 لە یاسای ماددە هۆشبەرەکان و کارتێکارە ئەقڵییەکان راگیراون و لێکۆڵینەوە لە دۆسییەکانیان بەردەوامە.

PUKMEDIA