زەیدی: قۆناغی داهاتوو هاوبەشیی راستەقینە و تێپەڕاندنی ناکۆکییەکان دەبێت

واع

عەلی زەیدی سەرۆکوەزیرانی عیراق

عەلی زەیدی سەرۆکوەزیرانی عیراق، دووپاتی دەکاتەوە، کە قۆناغی داهاتوو پێویستە قۆناغی هاوبەشیی راستەقینە بێت و هەموو ناکۆکییەکان تێپەڕێندرێت، بەڵێنیش دەدات رووبەڕووی گەندەڵی ببێتەوە و چاکسازی لە هەموو کەرتەکاندا بکات.

 عەلی زەیدی دوای دەستبەکاربوونی وەک سەرۆکوەزیرانی عیراق، وتارێکی پێشکەش کرد و رایگەیاند: عیراق ماوەیەکی زۆرە بەدەست قەیران و ئاڵنگارییەکانەوە دەناڵێنێت، سەرباری ئەوەی خاوەن سامانێکی زۆرە، بۆیە کاری لە پێشینەی حکومەتەکەمان دەستپێکردنی بەرنامەیەکی گشتگیری چاکسازی داراییە، کە ئامانج لێی بنیاتنانی ئابوورییەکی بەهێزی نیشتمانیی بەردەوامە.

پەیوەست بە گەندەڵیش، سەرۆکوەزیرانی عیراق، ئاماژەی بەوەکرد: سامانی گشتی وڵات دەپارێزین و رووبەڕووی گەندەڵی دەبینەوە،چونکە گەندەڵی تەنها کێشەیەکی ئیداری نییە، بەڵکو لەمپەرێکی گەورەیە لەبەردەم پێشکەوتن.

 راشیگەیاند: هەلیکار بۆ گەنجان دابین دەکەین و کەمکردنەوەی رێژەی بێکاری لە نێوان گەنجان کاری لە پێشینەی حکومەتەکەمانە.

هەر لە وتارەکەیدا، عەلی زەیدی دووپاتی کردەوە: پرۆژە ستراتیژییەکان لە هەموو بوارەکانی خزمەتگوزاری و ژێرخانی وڵات جێبەجێ دەکەن، حکومەت دەوڵەت بە دامەزراوەیی دەکات و گوێ لە هاووڵاتیان دەگرین.

 لە کۆتایشدا، سەرۆکوەزیرانی عیراق، رایگەیاند: پەیوەندییەکانمان لەگەڵ وڵاتانی عەرەبی و جیهانی پتەوتر دەکەین و لەسەر بنەمای رێزگرتنی هاوبەش پەیوەندییەکانمان رێکدەخەینەوە.

PUKMEDIA