سودانی: پشتگیری حکومەتی نوێی عیراق دەکەین

واع

محەمەد شیاع سودانی سەرۆکوەزیرانی عیراق

محەمەد شیاع سودانی سەرۆکوەزیرانی عیراق، لە وتاری ماڵئاواییدا پشتگیری خۆی بۆ حکومەتی داهاتوو دووپاتکردەوە و رایگەیاند: قەبارەی وەبەرهێنانەکانی عیراق زیاتر لە 114 ملیار دۆلاری تێپەڕاندووە و حکومەتەکەشی توانیویەتی لە ڕێگەی دیپلۆماسییەکی هاوسەنگ و فراوانکردنی مەودای دەسپێشخەرییە سیاسییەکانەوە پێگەی خۆی لەسەر ئاستی نێودەوڵەتی پتەو بکات.

 سودانی لە وتارەکەیدا رایگەیاند: عیراق لە ماوەی خولی حکومەتەکەیدا توانیویەتی لە ڕێگەی دیپلۆماسییەکی هاوسەنگ و فراوانکردنی مەودای دەسپێشخەرییە سیاسییەکان، پێگەی خۆی لەسەر ئاستی نێودەوڵەتی  بەهێز بکاتەوە، هاوکات جەختی لە پرەنسیپی بێلایەنی و نەچوونە ناو میحوەرە ناوچەییەکان کردەوە.

پەیوەست بەکارکردنی حکومەتەکەی و بەهێزکردنی لایەنی ئابوری، سودانی ئاشکرای کرد: قەبارەی وەبەرهێنانەکانی عیراق زیاتر لە 114 ملیار دۆلاری تێپەڕاندووە.

 وتیشی: لە بەرنامەی حکومەتدا، پێنج بوارمان بە هەند وەرگرتبوو، کە بریتی بوون لە رووبەڕووبونەوەی گەندەڵی و هەژاری و بێکاری، چاکسازی دارایی و ئیداری لەگەڵ پێشکەشکردنی خزمەتگوزاری.

 سودانی لە بارەی قەرزەکانی عیراقیش، رایگەیاند:  قەرزە دەرەکییەکانی عیراق لە 13 ملیار دۆلارەوە بۆ 10 ملیار دۆلار کەمی کردووە.


لە بارەی ئاڵۆزییەکانی ناوچەکە و هەوڵی دورخستنەوەی عیراق لە گرژییەکان، سەرۆکوەزیرانی عیراق رایگەیاند: ڕووبەڕووی کۆمەڵێک ئاڵنگاری ناوچەیی و نێودەوڵەتی بووینەوە، کە مەترسی فراوان بوونی هەبوو، بۆیە ئێمە هەموو هەوڵێکمان دا بۆ ئەوەی ئاگری ئەو شەڕ و ململانێیانە لە خاک و گەلەکەمان دوور بخەینەوە.

 سودانی لە کۆتایی وتارەکەیدا پاڵپشتی بۆ حکومەتی نوێ دووپاتکردەوە و رایگەیاند: پشتگیری لە هەموو بڕیارەکانی حکومەتی نوێ دەکەین، کە بۆ بەرژەوەندی گشتی دەریاندەکات.

PUKMEDIA