کێڵگەیەکی گەورەی نەوت لە نەجەف دۆزرایەوە

راگەیاندنی وەزارەتی نەوت

کێڵگە دۆزراوەکە

وەزارەتی نەوتی عیراق، دۆزینەوەی کێڵگەیەکی نەوتی لە پارێزگای نەجەف ڕاگەیاند، کە پێشبینی دەکرێت نزیکەی نۆ ملیار بەرمیل نەوتی تێدا بێت.

حەیان عەبدولغەنی جێگری سەرۆکوەزیران و وەزیری نەوتی عیراق،پێشوازی لە وەفدێکی کۆمپانیای زینهوای چینی کرد و ئاشکرای کرد: لە کێڵگەی قەرنەین لە پارێزگای نەجەف، توانیویانە کێڵگەیەکی گەورەی نەوت بدۆزنەوە.

بەپێی راگەیەندراوی وەزارەتی نەوت، پێشبینی دەکرێت کێڵگەکە 8  ملیار و 835 ملیۆن بەرمیل نەوتی یەدەگ لەخۆ بگرێت و رۆژانەش بتوانێت 3هەزار و 248 بەرمیل نەوت بەرهەمبهێنێت.
وەزیری نەوتی عیراق دووپاتی کردەوە: پێویستە کارکردن لە کێڵگەکەدا خێراتر بکرێت، بۆ ئەوەی بتوانن بەرهەمهێنانی نەوت دەستپێبکەن و سودیش لە غازی سروشتی ناوچەکە وەربگرن.

ئەم پڕۆژەیە لە چوارچێوەی گەڕی پێنجەمی تەواوکاری و گەڕی شەشەمی مۆڵەتەکانی نەوت دراوە بە کۆمپانیای زینهوای چینی، کە لە ساڵی 2024وە رێگەی پێدراوە لەو ناوچەیە بەدوای نەوتدا بگەڕێت.

رووبەری کێڵگەی قەرنەین، نزیکەی 8 هەزار و 773 کیلۆمەتری چوارگۆشەیە و دەکەوێتە پارێزگای نەجەف، کە هاوسنوورە لەگەڵ سعودیە، ئەم ناوچەیە بە یەکێک لە ناوچە هەرە دەوڵەمەندەکانی نەوت و غاز ئەژمار دەکرێت.

PUKMEDIA