نەناردنی داهات ناردنی مووچەی دواخستووە

PUKMEDIA

دراوی عیراقی

رێککارەکانی ناردنی مووچە بۆ فەرمانبەرانی هەرێم، لەلایەن وەزارەتی دارایی عیراقەوە تەواو بوون و تەنها ماوەتەوە حکومەتی هەرێم داهاتی نانەوتی مانگی رابردوو بۆ عیراق بنێرێت و ئەوانیش مووچە بنێرن.

بەپێی زانیارییەکانی PUKMEDIA، وەزارەتی دارایی عیراق وردبینی لیستی مووچەی مووچەخۆرانی هەرێمی تەواوکردووە، لەئێستادا چاوەڕوانی حکومەتی هەرێمە داهاتی نانەوتی مانگی نیسانی بۆ بنێرێت، تاوەکو مووچە بنێرێت.

هەرچەندە بەهۆی ئەو بارودۆخەی لەناوچەکەدا هەبوو مانگی رابردوو حکومەتی هەرێم بڕی 43 ملیار دیناری وەک داهاتی نانەوتی بۆ عیراق نارد، بەڵام بۆ ئەم مانگە چاوەرواندەکرێت عیراق بەو بڕە پارەیە رازی نەبێت، هەروەها وەک مانگەکانی رابردوتریش حکومەتی هەرێم لەتوانایدا نییە 120 ملیار دینار وەک داهاتی نانەوتی بۆ عیراق بنێرێت، بۆیە ئەم پرسە هێشتا لەنیوان وەزارەتی دارایی عیراق و هەرێم-دا یەکلا نەبووەتەوە.

هاوکات پەیامنێرمان لە بەغداد رایگەیاند: بەشێکی زۆر لە وەزارەت و دەستەکانی حکومەتی فیدراڵی مووچەی مانگی نیسانیان وەرگرتووە و لەچەند رۆژی داهاتوودا کۆتایی بەدابەشکردنی مووچە دێت لە عیراق.

بۆ ناردنی مووچە پێویستە سێ مەرج، کە وەزارەتی دارایی عیراق دیاریکردووە جێبەجێ بکرێت، کە ئەویش خۆی لە، ناردنی نووسراوێک لە وەزارەتی نەوتی عیراقەوە بۆ وەزارەتی دارایی کە تایبەتە بە هەناردەی نەوتی هەرێم لەڕێی سۆمۆوە، هاوکات لیستی مووچە و تەرازووی پێداچوونەوە کە پێویستە وەزارەتی دارایی هەرێم بۆ عیراقی بنێرێت، هەروەها داهاتی نانەوتی هەرێم کە پێویستە بۆ دارایی عیراق بنێررێت دەبینێتەوە، لەئێستاشدا دووان لەو مەرجانە جێبەجیکراون و تەنها مەرجی ناردنی داهاتی نانەوتی لەلایەن هەرێمەوە ماوەتەوە.

بەپێی زانیارییەکانی پەیامنێرمان لە بەغداد، ئەگەر ئەمڕۆ و سبەینێ وەزارەتی دارایی هەرێم داهاتی نانەوتی بۆ عیراق بنێرێت، چاوەڕواندەکرێت لەکۆتایی ئەم هەفتەیەدا عیراق مووچەی مانگی نیسانی مووچەخۆرانی هەرێم بنێرێت.

ئەمەش لەکاتێکدایە، ر‌ۆژی 12ی 4ی 2026 دابه‌شكردنی مووچه‌ی مانگی ئازاری مووچه‌خۆرانی هه‌رێم دابه‌شكرا و رۆژی 14ی4ی2026 كۆتایی به‌دابه‌شكردنی مووچه‌ هات.

PUKMEDIA