عیراق بۆ ناردنی مووچه‌ مه‌رجی ناردنی 120 ملیار دیناری نییه‌

PUKMEDIA

دراوی عیراقی

لیستی مووچەی مانگی نیسان و راپۆرتی تەرازووی پێداچوونەوەی مانگی ئازار بۆ بەغداد نێردراوە و وەزارەتی دارایی عیراقیش ناردنی 120 ملیار دینار وەک داهاتی نانەوتی لەم مانگەشدا ناکاتە مەرج بۆ ناردنی مووچە.

خالید شوانی وەزیری دادی عیراق بە میدیاکانی راگەیاند: محەمەد شیاع سودانی سەرۆکوەزیرانی عیراق بەتێگەیشتنی لەبارودۆخەکە، کە بۆ ئەم مانگەش هەرێمی کوردستان ناتوانێت 120 ملیار دینار وەک داهاتی ناوخۆ رادەست بکات، بڕیاریدا بۆ ئەم مانگەش بە کەمتر لەوبڕە رازی ببن و مووچە بنێرن.

 راشیگەیاند: لەئێستادا ئەوەی ماوەتەوە تەواوکردنی رێکار و جێبەجێکردنی ئەرکەکانە لە لایەن هەرێمی کوردستانەوە، تاوەکو مووچەی مانگی 4 خەرج بکرێت.

ر‌ۆژی 21ی4ی2026، وه‌زاره‌تی دارایی و ئابووری حکومەتی هه‌رێمی كوردستان، له‌ راگه‌یه‌ندراوێكدا ئاماژه‌ی به‌وه‌كرد، لیستی مووچه‌ی مانگی نیسانی فه‌رمانبه‌ران و مووچه‌خۆرانی هه‌رێمی كوردستان و ڕ‌اپۆرتی ته‌رازووی پێداچوونه‌وه‌ی مانگی ئازار له‌لایه‌ن تیمی ته‌كنیكی وه‌زاره‌تی دارایی و ئابووری هه‌رێمی كوردستانه‌وه‌ ر‌ه‌وانه‌ی به‌غداد كرا‌.

ئەمەش لەكاتێكدایە، مانگەكانی رابردوو وەزارەتی دارایی حكومەتی هەرێمی كوردستان بڕی 120 ملیار دینار داهاتی نانەوتی دەخستە سەر هەژماری بانكی وەزارەتی دارایی عیراق، بەڵام بۆ مانگی ئادار تەنها یەك لەسەر چواری ئەو داهاتەی بۆ عیراق ناردووە، كە بڕەكەی نزيكەی 44 ملیار دینارە بۆ مووچەی مانگی ئاداریش حکومەتی فیدراڵ ناردنی 120 ملیار دینار لەلایەن هەرێمەوە ناکاتە مەرج بۆئەوەی مووچە بنێرێت، دیاریش نییە بۆ مووچەی مانگەکانی داهاتوو بەهەمان میکانیزم دەبێت یاخود نا.

هاوکات، ر‌ۆژی 12ی 4ی 2026 دابه‌شكردنی مووچه‌ی مانگی ئازاری مووچه‌خۆرانی هه‌رێم دابه‌شكرا و رۆژی 14ی4ی2026 كۆتایی به‌دابه‌شكردنی مووچه‌ هات.

PUKMEDIA