یەکەم بەردی سەنگەر...ژیاننامەی شەهیدی سەرکردە و ئەتڵەسی سەنگەرە ئاوەدانەکەی رواندزە

pukmedia

ستران عەبدوڵا

ستران عەبدوڵا
سوپاس بۆ کاک هیوا سەید سەلیم نووسەر و کوڕی شەهیدی سەرکردە سەید سەلیم بۆ کتێبە پڕ و دەوڵەمەندەکەی( یەکەم بەردی سەنگەر) یەکەم بەردی سەنگەر هەر بیۆگرافیای شەهیدی نەمر سەید سەلیم و  رۆڵی ئازایانەی لە شۆرشی ئەیلول و تێهەڵچوونەوەی خەباتی شۆڕشی نوێ بە هەموو بەرە و ئاراستەکانییەوە نییە، بەڵکو جوگرافیای دەڤەرەکە و رۆڵی مێژوویی رواندز و دەوروبەری لە خەباتی سیاسیی و نیشتمانی و چینایەتی   گەلەکەمان تۆمار دەکات لە سەدەی بیستەمی نیوان دوو جەنگی جیهانی تا دەستپێکردنی بزووتنەوەی حەریفانەی کوردایەتی لە رێی حزب و رێکخراوەکانەوە و ململانێ کۆمەڵایەتی و دەروون چینایەتییەکانی ئەو سەردەمە.

کتێب بەم بەسەرکردنەوە جوگرافی و مێژووییە زەمینەی سروشتی و مێژووکردی شۆرش لە دەڤەرەکە وەک بەشێک لە کوردستانی باشوور بەسەردەکاتەوە، رووداوەکان وا چنراون پێمان دەڵێ  زوڵمی نەتەوەیی و نیشتمانی و  کۆمەڵایەتی سەر کۆمەڵانی خەڵک پەرەسەندنەکان قەرزاری دوو شۆڕشی لەسەر یەک دەکا و دۆخی دژواری نێوانیان لە ئاوارەیی و دەربەدەری و قەڵاچۆکردن دەکاتە خوێی بەسوێی ناو برینەکانی زەحمەتکێشانی ژن و منداڵ و هاوڵاتی سیڤیلی پانتایی ناوچە رزگارکراوەکانی شۆڕش و ناوچەکانی ژێر دەستی دیکتاتۆری بەعس .

یەکەم بەردی سەنگەر روونە کە دەیەوێ پێمان بڵێ و لەمەشدا بێگومان ڕاست دەکات بزووتنەوەی شۆڕشگێری قەدەغەو قاچاخی بندەستەکان کە رووبەرووی دیکتاتۆری و داگیرکەری شۆڤێنی بەعس بۆتەوە پێویستی بە گیانباز و لە خۆبردوو و سەرکردە و فەرماندە هەیە کە لەم چیرۆکەدا لە فەسڵەکانی دواتردا سەید سەلیم دەبێتە نموونەیەکی جوامێرانەی نەبەرد و بەرەنگاری و باقی کتێبەکەی بۆ تەرخان دەکرێت.

بەردی سەنگەر لەم کۆتاییەدا خوێنینە و سوورە وەک مژدەی هەموو خەباتێکی رەوا و دادپەروەر. شەهیدە بە پێداگرییەوە  کە بە خوێنی خۆی جوابی تەحەداکان دەداتەوە و لە ئاستی قسەدا رایناگرێت.
هەرچی بڵێم لەسەر کتێبەکەی کاک هیوا (کە ئیتر هەر کوڕی شەهید نییە کە هاوڕێکانی باوکی بۆی بەخەمن و هەر هەڵسوڕاوێکی سیاسیی نییە لە ناو پرۆسەی سیاسیی کوردستان، بەڵکو ساحێبی کتێبی سەنگینیشە و هیترمان لێی دەوێت) جێی خوێندنەوەی راستەوخۆ ناگرێتەوە و پێم وایە ئێمە لەبەردەم کتێبێکی رێکوپێکداین کە لە خۆڕایی ستایش و لە خۆڕایش رەخنە ناگرێت ، بەڵکو لە حزوری شەهیدێکی وەک سەید سەلیم و تێکۆشەرانی بزووتنەوەی سۆشیالیست وەک چەترێکی پێکەوەیی لە ناو یەکێتیی و شۆڕشی نوێشدا سەرچێخی تیا نییە و هەقی رەوای خەباتی هەمەلایەنەی گەلەکەمان دەدات، بە پێچەوانەی زۆر ڕەشکردنەوەی لاپەڕە کە ناوی لە خۆی ناوە کتێب و لە ئاکامدا  شەرم دەکات لە هەڵسەنگاندنی زانستی و دادپەروەرانە بەقای پێ بکەین.

ئێ بە خوا وەکو یەکێتییەکیش پێم خۆشە لە نێو هەموو باسەکاندا ئەوەش بگێڕمەوە کە جەنابی مام جەلال وەختێک لە  سەرکردایەتی شۆرش شەهید سەید سەلیم دەبینێ پێی دەڵێ (سەید سەلیم چەند کەسێکی وەکو تۆ لە نێو شۆڕش هەبێ ئازادکردنی شاری کەرکوک بە قۆنتەرات دەگرم.. لاپەڕە ١٣٨)
رۆحی مام و سەید شاد بێت و کاروانی خەبات تا بەدیهاتنی گشت ویستە نەتەوەییەکانیان بەردەوام بێت.
 ئەم کتێبە بۆ دیکۆمنتارییەکی سەنگین و پڕ ناوەرۆکیش دەست دەدات بە مەرجێ کاک  هیوا ئاگای لە ئاراستە و سینایۆکەی بێت بۆ ئەوەی رۆحە ئیجابییەکەی نەشەمزێ.

PUKMEDIA