شەهیدەکانی کەرکوک هەڤاڵی یەکێتین

PUKMEDIA

وێنەی شەهیدان هاوكار، سەمەد، حوسێن و هەڤاڵ)

ژمارەی شەهیدەكانی رووداوە نەخوازراوەكەی كەركوك و پشێوییەكان چوار شەهیدن، كە سەرجەمیان هەڤاڵ و تێكۆشەری ریزەكانی یەكێتیی نیشتمانیی كوردستانن و هۆكاری ئاڵۆزییەكانیش ململانێی سیاسی و شەڕی بارەگای حزبییە و پەنجەی تۆمەتیش بۆ پارتی دیموكراتی كوردستان رادەكێشرێت.

گەنجێكی دیكەی كەركوك بەهۆی ئاڵۆزییەكانی شارەكەوە شەهید بوو، بەمەش ئاماری قوربانیان گەیشتە چوار شەهید و 15 بریندار، بەپێی ئەو زانیاریانەی كە دەست PUKMEDIA كەوتوون، هەر چوار شەهیدەكەی ئاڵۆزییەكانی دوێنێ ئێوارەی كەركوك هەڤاڵ و تێكۆشەری ریزەكانی یەكێتیی نیشتمانیی كوردستانن و پەنجەی تۆمەتیش بۆ پارتی دیموكراتی كوردستان رادەكێشرێت.

بافڵ جەلال تاڵەبانی سەرۆكی یەكێتیی نیشتمانیی كوردستان لەبارەی گرژی و ئاڵۆزییەكانی شاری كەركوك-ەوە، پەیامێكی بڵاوكردەوە و وێڕای ئیدانەكردنی رووداوەكان رایگەیاند: "كەركوكییە سەربەرزەكان شایەنی رێزی بێسنوور و خزمەتكردنێكی بەرچاون نەك بەكارهێنانیان بۆ یەكلاكردنەوەی كێشە سیاسییەكان".

"بەهیچ شێوەیەكیش قبووڵ ناكەین خوێنی گەنجەكانمان بڕژێت و لەژێر ناوی هەستی نەتەوایەتیدا یاری بە چارەنووس و ژیانیانەوە بكرێت" سەرۆك بافڵ وادەڵێت.

هاوكات لە پەیوەندییەكی تەلەفۆنیدا بافڵ جەلال تاڵەبانی سەرۆكی یەكێتیی نیشتمانیی كوردستان لەگەڵ محەمەد شیاع سودانی سەرۆكوەزیرانی عیراق هاوڕابوون، لێكۆڵینەوەی ورد لە هۆكاری دروستبوونی ئاڵۆزییەكان و شەهیدبوون و برینداربوونی چەند گەنجێكی كورد بكرێت.

‎هەروەك سەرۆك بافڵ داواشیكرد: "تاوانبارانی شەهیدكردن و برینداركردنی گەنجانی كورد بدرێنە دادگا".

هەر لەبارەی ئاڵۆزییەكانەوە، مەكتەبی سیاسی یەكێتیی نیشتمانیی كوردستان راگەیەنراوێكی بڵاوكردەوە و رایگەیاند: "بارودۆخی دژواری كەركوك بەهۆی شەڕكردن لەسەر  بارەگای حزبی و ململانێی هێزە سیاسییەكانی ناو كەركوك درێژەی كێشاوە گەیشتە پێكدادان و بەریەك كەوتن و شەهید و برینداریش كە ئەمانە قوربانی بێباكی سیاسی و نیشتمانییە".

ئاسۆ مامەند كارگێڕی مەكتەبی سیاسی یەكێتیی نیشتمانیی كوردستان لەبارەی دروستبوونی خۆپیشاندان و ئاڵۆزییەكانی دۆخی كەركوك رایگەیاند: "بەداخەوە كێشەی بارەگایەكی پارتی لە كەركوك خۆپیشاندانی لێكەوتەوە و چەند رۆژە ئێمە هەوڵی ئەوە دەدەین كار لەسەر ئەوە بكەین چارەسەر بكرێت، بارەگایەك شایەنی دروستبونی گرژی و كێشەی نێوان كورد و عەرەب نیییە كە بەداخەوە چەندین شەهید و برینداری لێكەوتەوە".

ئەمڕۆش 3-9-2023، مەكتەبی سیاسی یەكێتیی نیشتمانیی كوردستان سەبارەت بە شەهید و برینداربووانی گرژی و ئاڵۆزییەكانی كەركوك پەیامێكی هاوخەمی بڵاوكردەوە و وێڕای سەرەخۆشی لە كەسوكار و خانەوادەی سەربەرزی ئەو شەهیدانە رایگەیاند: "داوا لە سەرۆك وەزیرانی عیراق و لایەنە پەیوەندیدارەكان دەكەین، بە زوویی ئەوانەی كە تەقەیان بە رووی خوپێشاندەراندا كردووە بە سزای خۆیان بگەن و روبەڕووی یاسا بكرێنەوە".

PUKMEDIA