لەسینەما سالمی سلێمانی نمایشی فیلمی نامۆ دەستپێدەكات

نمایشی فیلمی سینەمایی نامۆ لەدەرهێنانی نادر ساعی وەرو بەڕۆڵ بینینی ئەكتەری بەئەزمونی كورد بەختیار پەنجەیی لەسینەما "سالم لە سلێمانی دەستپێدەكات.
بەپێی راگەیەنراوێك نمایشی گشتی فیلمی سینەمایی (نامۆ (بێگانە) Namo) لەدەرهێنانی نادر ساعی وەر، لەبەرهەمهێنانی هاوبەشی مەستانە موهاجیرو تەهوورا ئەبولقاسمی و بەسەرمایەی هاوبەشی ئەكتەری ناوداری كورد نەوید محەمەد زادەو ئەكتەری ناوداری سینەمای ئێران پێژمان بازغی و بەڕۆڵ بینینی ئەكتەری بەئەزموونی مەهابادی بەختیار پەنجەیی و چەندین ئەكتەری ناوداری دیكە رۆژی 8-8-2022 لەسینەما سالم لەشاری سلێمانی پایتەختی رۆشنبیری هەرێمی كوردستان دەستپێدەكات و دەرهێنەرو ئەكتەری بەرهەمەكەش پەیامێكیان ئاڕاستەی لایەنگران و هۆگرانی هونەری سینەما لە هەرێمی كوردستان كردوە.  
بەختیار پەنجەیی، ئەكتەری كوردی فیلمی سینەمایی (نامۆ) لەپەیامەكەیدا دەڵێت: " زۆر بەختەوەرم بەبۆنەی نمایشی گشتی فیلمی سینەمایی (نامۆ) لەباشووری كوردستان، پێموایە (نامۆ) بەشێك لەسینەمای كوردی نەبێت، بەڵام پیشاندانی ئەم فیلمە لەهەر شوێنێكی كوردستان، بەجۆرێك گەڕانەوەیە بۆ یەكێك لەسەرچاوەكانی ئەم فیلمە، چونكە ئەم بەرهەمە یەكێك لەسەرچاوەكانی كەسایەتی روناكبیری كەسێكی كوردستانییە، هیوادارم لەبینینی فیلمەكە چێژ وەرگرن.
هاوكات  نادر ساعی وەر،‌ دەرهێنەری فیلمی سینەمایی نامۆ، دەڵێت: بەختەوەرم كە فیلمی نامۆ لەكوردستان نمایش دەكرێت. زۆرێك لەهەڤاڵان لە چەندین هەفتەی رابردوودا هەوڵ و یارمەتی زۆریاندا تا ئەم فیلمە بگاتە قۆناغی نمایش لە هەرێمی كوردستان، پێمخۆشە بەهاوڕێیەتی لەگەڵ ئێوە فیلمەكە لەسەر پەردە ببینم و پێكەوە لەسەر فیلمەكە گفتوگۆی زۆر باش بكەین.  
نمایشی فیلمی سینەمایی نامۆ، بەهاوكاری وەزارەتی رۆشنبیری و لاوانی حكومەتی هەرێمی كوردستان و كۆمپانیای ئەڵمانی (ئاڕت هوود ئینتێرتەیمێنت، ArtHood Entertainment) بڵاوكەرەوەی نێودەوڵەتی ئەم فیلمە لە سینەمای شارە جۆراوجۆرەكانی هەرێمی كوردستان پیشان دەدرێت.
PUKmedia