قوباد تاڵەبانی.. 9هەمین ساڵیادی كۆچی شێركۆ بێكەس دەكاتەوە

قوباد تاڵەبانی لە پەڕەی تایبەتی خۆی لە فەیسبوك لە بارەی 9هەمین ساڵیادی كۆچی شاعیری كورد شێركۆ بێكەس نوسیویەتی:

شێركۆ بێكەس  لە ڕووی خەیاڵ و هەم لە ڕووی زمان و شێوازی نووسینی شیعرەوە، بە یەكێك لە شاعیرە گەورە و نوێخوازەكانی كورد دادەنرێت. كۆی ئەزموونی شیعریی شێركۆ بێكەس بریتییە لە خەمی كوردبوون. كوردبوون بۆ ئەو ئازارێكی كەڵەگەت بوو، سەرچاوەی هێز و وزەی داهێنانی بوو. ئەو، شاعیر و قسەكەری بەویژدانی هەموو ئەو تراژیدیانە بوو، كە كوردی پیادا تێ دەپەڕی. گەر ئێستا ئەو لە ناوماندا بمایە، دەبوو بەو دەنگە توڕە و بریندارە كوردانەیەی خۆی، چۆن چیرۆكی كچە یەزیدییە بە كەنیزەككراوەكانی بگێڕایەتەوە، چۆن باسی بە سوتماك كردنی نیشتمان و بە حەڵاڵكردنی خوێنی كوردی بهۆنیایەتەوە، ئێمە هەموومان لە كارەساتەكاندا، ئەوەی زۆر بیری دەكەین، ئەو دەنگە شیعریە مەزنەی ئەو پیاوەیە، كە دەیتوانی لەو دنیا جوانەی شیعری خۆیدا بەرگریمان لێ بكات. 

درود بۆ گیان و شیعری تۆ شێركۆ بێكەس.

PUKmedia