خولی راگەیاندنی بەڕێوەبەرایەتی لاوانی سلێمانی كۆتاییهات

لەچوارچێوەی كاروچالاكییەكانیدا، بەڕێوەبەرایەتی لاوانی سلێمانی بەهاوكاری تەلەفزیۆنی گەلی كوردستان، لە ماوەی رابردوودا خولێكی راگەیاندنی بۆ 60 فێرخواز كردووە، كە ماوەی دە رۆژی خایاند.

دوای پێشكەشكردنی چەندین بابەت و زانیاری میدیایی لە بوارەكانی هەواڵ، راپۆرت، بێژەریی و پەیامنێریی لە لایەن شارەزایانی بواری میدیا  د. ئیبراهیم سەعید و د.شێركۆ جەبار بە فێرخوازان، ئەمڕۆ خولەكە كۆتایی هات.

لە مەراسیمی كۆتایی خولەكەدا ستران عەبدوڵڵا لێپرسراوی مەكتەبی راگەیاندنی یەكێتیی نیشتمانیی كوردستان لەوتەیەكدا سوپاسی هەوڵەكانی بەڕێوەبەرایەتی لاوانی پارێزگای سلێمانی كرد بۆ چالاكییە فراوانەكانیان و خزمەتی گەنجان و لاوانی شاری سلێمانی، بەتایبەت لەبواری راگەیاندندا و وتی: ئێوەی فێرخواز و ئارەزوومەندی كاری میدیایی دەتوانن لەمڕۆوە رێگە بەخۆتان بدەن كە كاری میدیایی بكەن و ببنە رۆژنامەنووس چونكە بەشداریی خولێكی پێشكەوتووی لەم جۆرەتان كردووە. 
هەر لە چوارچێوەی بەخشینی خەڵاتەكاندا، سایتی PUKmedia ش خەڵاتی رێزلێنانی بەڕێوەبەرێتی لاوانی پارێزگای سلێمانی پێبەخشرا، لەپای بڵاوكردنەوەو روماڵی چالاكییەكانی ئەو بەڕێوەبەرایەتییەدا.
PUKmedia ڤینۆس تۆفیق