بەڕێوبەری نەخۆشخانەی هیوا: توانامان رۆژ بە رۆژ لاواز دەبێت

نەخۆشخانەی هیوا لە شاری سلێمانی تایبەتە بە نەخۆشانی شێرپەنجە و ژمارەیەکی زۆر نەخۆش سەردانی دەکەن و بەڕێوبەری نەخۆشخانەکەش دەڵێت، لە ماوەی 48 سەعاتی رابردوودا  زیاد لە 2000 نەخۆش سەردانی نەخۆشخانەی هیوایان کردوە و توانامان رۆژ بە رۆژ لاواز دەبێت.

د. یاد نەقشبەندی بەڕێوبەری نەخۆشخانەی هیوا رایگەیاند: رۆژانە 600 نەخۆش سەردانی نەخۆشخانەی هیوا دەکەن و زۆرینەی نەخۆشەکانمان لە ناوەڕاست و باشووری عیراقەوەن.

وتیشی: رۆژانە زیاد لە 15 حاڵەتی نوێ تۆماردەکرێن هەروەها 600 کەس سەردانمان دەکەن و بینای نەخۆشخانەی هیوا دەرەقەتی ئەو ژمارە زۆرە نایەت.

د. یاد نەقشبەندی ئەوەشی خستەروو: هاتنی ئەم ژمارە زۆرە هۆکاری ئەوەیە ئێمە لە رووی ئاستی زانستی و خزمەتگوزارییەوە چەندین ساڵە پلەی یەکەمین لە عیراقدا، ئەمەش وای کردووە لە پارێزگاکانی تری هەرێم و ناوەراست و خواروی عیراق سەردانی نەخۆشخانەی هیوا بکەن

باسی لەوەشکرد: سەرجەم قاوشەکانی نەخۆشخانەی هیوا پڕبوون، لە مانگی 6ی ئەمسالەوە هەندێک جار شوێنمان نەماوە نەخۆش چارەسەر بکەین، هەروەها زیاد لە 9 مانگە 200 نەخۆش خۆیان دەرمان دەکڕن چونکە هەندێک جۆری دەرمان لە نەخۆشخانەکەمان نەماوە.

بەڕێوبەری نەخۆشخانەی هیوا داوای ئەوەشی کرد: لە ئاستی باڵا و ئاستی وەزارەتەکان و ئەنجومەنی وەزیران پەیامی ئێمە بگەیەنن بە ئەنجومەنی وەزیران و باس بکرێت، دۆخەکە مەترسیدارە چونکە نەخۆشمان هەیە لەبەر ئەوەی چارەسەرەکەی دواکەوتوە مردوە.

PUKmedia