چه‌ند رێنماییه‌كی ته‌ندروستی بۆ ئه‌و هاووڵاتییانه‌ی قوربانی ده‌كه‌ن

ته‌ندروستی سلێمانی رایگه‌یاندوه‌، بۆ دووربوون له‌نه‌خۆشی تای خوێن به‌ربوون پێوسته‌ له‌كاتی سه‌ربڕ‌ینی ئاژه‌ڵ بۆ قوربانی ئه‌م ڕ‌ێنماییه‌ زانستیانه‌ جێبه‌جێ بكرێت.

۱- سه‌ربڕ‌ینی ئاژه‌ڵ پێویسته‌ له‌ناوئه‌و سه‌ربڕ‌ینخانانه‌دا بێت كه‌ڕ‌ێگه‌ پێدراون وپزیشكی ڤێنته‌رنه‌ی سه‌رپه‌رشتی ده‌كات .

۲-  له‌كاتی سه‌ربڕ‌ینی ئاژه‌ڵدا وه‌ كه‌وڵكردن وه‌یان پارچه‌ پارچه‌كردنی گۆشته‌كه‌یدا پۆشینی جل وبه‌رگی خۆپارێزی  وك ( ده‌ستكێش ،جزمه‌ ،سه‌دریه‌ی  پلاستیك ، ماسكی ده‌مووچاو ) پێویسته‌ له‌به‌ركرێن

۳-  نابێت خانه‌واده‌ یان خه‌ڵك كۆ ببنه‌وه‌ له‌چوارده‌وری سه‌ربڕ‌ه‌كه‌ (قه‌ساب) وه‌ نابێت هاوكاری بكه‌ن له‌كاتی سه‌ربڕ‌ینی ئاژه‌ڵ و پارچه‌ پارچه‌ كردنی گۆشت.

٤-  به‌بێ ده‌ستكێش مامه‌ڵه‌ كردن له‌گه‌ڵ جه‌سته‌ی ئاژه‌ڵی سه‌ربڕ‌او مه‌كه‌ وه‌ دوای پۆشینی ده‌ستكێش و كه‌لوپه‌لی خۆپارێزی گۆشته‌كه‌ پارچه‌پارچه‌ بكه‌ و پاشان ده‌ستت به‌باشی بشۆ .

٥- لابردنی پاشماوه‌ی ئاژه‌ڵه‌ سه‌ربڕ‌اوه‌كان ودانانی كیسی داخراو فڕ‌ێدانی بۆشوێنی تایبه‌ت .

٦- به‌كارهێنانی چه‌قۆ و ته‌خته‌ی پارچه‌پارچه‌كردنی تایبه‌ت به‌گۆشت وه‌شتن و پاكژكردنه‌وه‌ی ته‌خته‌ و چه‌قۆكان دوای به‌كارهێنان 

۷-پاككردنه‌وه‌ی ئه‌و شوێنه‌ی ئاژه‌ڵه‌كه‌ی لێ سه‌رده‌بڕ‌ێت و به‌تایبه‌ت ئه‌وشوێنانه‌ی خوێنی لێیه‌ به‌مادده‌ی كلۆریین (بلیچ- موعجیزه‌)  ڕ‌وونكراوه‌..

۸ - باشتر وایه‌ گۆشت دوای سه‌ربڕ‌ینی ئاژه‌ل بوماوه‌ی نیو كاتژمێر له‌ پله‌ی (٤ - ٨ )پله‌ی سه‌دی هه‌ڵبگیرێت پاشان به‌كاربهێنریت. به‌ڵام گۆشتی كوڵاو  هیچ كێشه‌ی نیه‌و سه‌لامه‌ته‌ ونابێته‌ هۆی توشبوون به‌نه‌خۆشی تای خوێن به‌ربوون .

۹-  ئه‌گه‌ر ئاژه‌ڵ گه‌نه‌ یان مێرووی تری هه‌بوو باشتر وایه‌نه‌یكریت یان سه‌ری نه‌بڕ‌ێت بو دوربوون له‌ نه‌خۆشی تای خوین به‌رببوون. ئه‌م نه‌خۆشیه‌ له‌نێوان ئاژه‌ڵه‌كان ده‌گوازرێته‌وه‌، وه‌ بۆ مرۆڤیش، به‌هۆی گه‌نه‌ و مێروه‌كانی كه‌له‌سه‌ر ئاژه‌ڵه‌كان ده‌ژین وه‌به‌هۆی خوێن و گۆشتی ئاژه‌ڵه‌كه‌وه‌ ده‌گوازرێته‌وه‌ .

PUKmedia ڕ‌اگه‌یاندن و په‌یوه‌ندییه‌كانی ب.گ.ته‌ندروستی سلێمانی