ژمارەیەك خوێندكار لەتاقیكردنەوەی بیركاری بێبەش دەكرێن

سەرپەرشتیارێكی پەروەردەیی رایدەگەیەنێت: بەهۆی هەڵەیەكی تەكنیكی لیژنەی ئەزمونەكان، ژمارەیەك لە خوێندكارانی12ی ئامادەیی لەشاری هەولێر، لە ئەنجامدانی  سێیەم تاقیكردنەوە،  كە وانەی بیركاری بوو بێبەشكران، ئاماژە بەوەشدەكات ئەمساڵ شێوازی پرسیارەكان لەگەڵ ساڵانی رابردوو جیاوازە، ئەوەش وایكرد بۆ بەشێك لەبەشداربوان زەحمەت و گران بێت.
عیسا حسێن سەرپەرشتیاری پەروەردەیی لەشاری هەولێر بە PUKmediaی راگەیاند: تێبینیمان كردوە پرسیارەكانی ئەمساڵی 12ی ئامادەیی لەگەڵ ساڵانی رابردوو جیاوازە، بەجۆرێك بەشێوەیەكی وورد دانراوە، ئەمەش وایكردووە بەلای بەشێك لە خوێندكاران پرسیارەكان بەگران و زەحمەت لێكبدرێتەوە.
وتیشی: ئامانج لە هێناوەی پرسیاری زەحمەت و ورد بەو ئامانجەیە خوێندكارانی بەتواناو ئاست نزم لەیەكتر جیابكرێتەوە، چونكە ئەو پرسیارانەی ئەمساڵ هاتۆتەوە هی ناو كتێب و پڕۆگرامەكەیە، واتا لەدەرەوە دانەنراوە، بۆیە ئەگەر خوێنكارێك زیرەك بێت بەئاسانی دەتوانێ وەڵامبداتەوە، ئەوانەشی وەك پێویست  نەیانخوێندوە بەلایەنەوە زەحمەتە.
سەرپەرشتیارەكەی پەروەردەیی ئاماژەی بەوەشكرد: لەبارەی چۆنیەتی رێكخستنی ئەزمونەكان بەگشتی، لەڕووی ئاو كارەبا تاڕادەیەك باشە، كێشەیەكی ئەو تۆ نیە، هەروەها لەبارەی رێگاگرتن لە گزی و ساختەكاری بەهەمانشێوە بەراورد بەساڵانی رابردوو باشترە، لەگەڵ ئەوەش هێشتا بەتەواوەتی ناتوانرێ كۆنتڕۆڵی ئەو دیاردەیە بكرێت.
عیسا حسێن ئەوەشی خستەڕوو: ئەوەی جێگای تێبینی و نیگەرانی ئێمەبوو، ئەمڕۆ لە سێیەم وانەی ئەزمونەكانی 12ئامادەیی و لەیەكێك لە هۆڵەكانی شاری هەولێر،  بەشێك لە خوێندكاران لە لیستی پرسیارەكان بێبەشكران، بەهۆیەوە نەیانتوانی تاقیكردنەوە ئەنجامبدەن.
روونیشیكردەوە: لەو هۆڵە ژمارەی لیستی پرسیارەكان  كەمتر بوو لە ژمارەی  بەشداربوان، لەكاتێكدا بەگوێرەی رێنماییەكان، هەر خوێندكارێك كۆدی خۆی هەیە،  ئەمەش زیانێكی زۆری لەوانەدا كە لیستی پرسیارەكەیان بەرنەكەوت، بەهۆیەوە ئەو خوێندكارانە بۆ خولی دووەم مانەوە، بەبێ ئەوەی ئەوان هیچ هەڵەیەكیان هەبێت.
PUKmedia تەهاعەبدوڵڵا