فه‌ره‌نسا.. توشبوون به‌كۆرۆنا زیاد ده‌كاته‌وه‌

به‌رپرسانی فه‌ڕه‌نسا ئه‌مڕۆ شه‌ممه‌ له‌ئه‌نجامی به‌رزبوونه‌وه‌ی بێشووماری حاڵه‌ته‌كانی توشبوون به‌كۆرۆنا داوا ده‌كه‌ن پابه‌ندبوون به‌ به‌ستنی ده‌مامك بگه‌ڕێته‌وه‌و ژماره‌یه‌كیش له‌حاڵه‌ته‌كان ره‌وانه‌ی نه‌خۆشخانه‌ كراون، به‌ڵام دۆخه‌كه‌ نه‌گه‌یشتۆته‌ ئه‌وه‌ی جارێكی تر كۆتوبه‌نده‌كان به‌شێوه‌ی پێشوو پسه‌پێنرێته‌وه‌.

به‌رپرسانی فه‌ڕه‌نسا ئه‌و فه‌رمانه‌یان له‌چوارچێوه‌ی بانگه‌شه‌و راسپارده‌دا گه‌ڵاڵه‌كردووه‌و نه‌گه‌یشتوونه‌ته‌ ئه‌وه‌ی وه‌ك پێشوو كۆتوبه‌نده‌كان پسه‌پێننه‌وه‌ كه‌ ره‌نگه‌ ببێته‌ هۆكاری ئه‌وه‌ی ئاستی گه‌شتیاری داببه‌زێت به‌تایبه‌تی له‌م وه‌رزی گه‌شتیارییه‌ گه‌شه‌سه‌ندووه‌ی ئێستادا، یاخود هۆكار بێت  ناڕه‌زایه‌تییه‌كان له‌دژی حكومه‌ت تازه‌ ببنه‌وه‌.

له‌و باره‌یه‌وه‌، ئۆلیگا گریگوار وته‌بێژی حكومه‌تی فه‌ڕه‌نسا رایگه‌یاند، له‌ئێستادا پلانیان نییه‌ كۆتوبه‌نده‌كان پسه‌پێننه‌وه‌ كه‌ رێگری ده‌كات یاخود مه‌رج بۆ گردبوونه‌وه‌كان له‌ناوخۆو چالاكییه‌كانی دیكه‌ داده‌نێت.

وته‌بێژه‌كه‌ی حكومه‌تی فه‌ڕه‌نسا له‌میانی چاوچێكه‌وتنێكی ته‌له‌فزیۆنیدا ئه‌وه‌ی به‌بیرهێنایه‌وه‌ كه‌ فه‌ڕه‌نسییه‌كان له‌كۆتوبه‌نده‌كان بێزاربوون و بڕواشمان وایه‌ خه‌ڵك به‌رپرسانه‌ هه‌ڵسوكه‌وت ده‌كه‌ن.

جێی ئاماژه‌یه‌ حكومه‌تی فه‌ڕه‌نسا له‌مانگی نیسانی رابردوودا به‌شێكی زۆری كۆتوبه‌نده‌كانی په‌یوه‌ست به‌ ڤایرۆسی كۆرۆنای هه‌ڵگرت و جارێكی تریش گه‌شتیارانی بیانی به‌ڕێگه‌ی ئاسمانی  وشكانی و ده‌ریاوه‌ بۆ كه‌ناره‌كانی ده‌ریای ناوه‌ڕاست و چێشتخانه‌كان و باڕه‌كان گه‌ڕانه‌وه‌.

به‌گوێره‌ی داتا ڕه‌سمییه‌كانی فه‌ڕه‌نسا رۆژانه‌ 1000 نه‌خۆش كه‌تووشبوون به‌ كۆڤید-19 ره‌وانه‌ی نه‌خۆشخانه‌كان ده‌كرێن.

به‌گوێره‌ی خه‌مڵاندنی رێكخراوی (Our World in Data) ژماره‌ی توشبوون به‌په‌تاكه‌ له‌سه‌رجه‌م وڵاتانی ئه‌وروپا و ئه‌مریكا روویان له‌به‌رزبوونه‌وه‌ كردووه‌، به‌ڵام رێژه‌كه‌ له‌فه‌ڕه‌نسا به‌تایبه‌تی ئه‌وانه‌ی حاڵه‌ته‌كانیان قورسه‌و پێویستییان به‌چاره‌سه‌ر له‌نه‌خۆشخانه‌كان هه‌یه‌  له‌ئاستێكی به‌رزدایه‌.

PUKmedia ئاژانسه‌كان