پسپۆڕێك: هەنگاوی پێویست بۆ رێگریكردن لەبڵاوبوونەوەی توشبوون بەكۆرۆنا بنرێت

پسپۆڕێكی بواری تەندروستی ئەمڕۆ شەممە داوایكرد كەپێویستە هاووڵاتیان جارێكی تر پابەندی رێكارە تەندروستییەكان ببن تاوەكو رێگری لەبڵاوبوونەوەی پەتای كۆرۆنا لەسەرانسەری وڵاتدا بكرێت.

وەزارەتی تەندروستی فیدڕاڵ دوێنێ هەینی رایگەیاند لەماوەی 24 سەعاتی رابردوودا  2952 حاڵەتی نوێی توشبوون بەڤایرۆسی كۆرۆنا تۆماركراون.

لەم بارەیەشەوە، د.ئوسامە ئەلعانی دكتۆری دەرمانساز بە PUKmediaی راگەیاند: قورسە هاووڵاتییان ناچار بەپابەندبوون بەرێكارە خۆپارێزییەكانی وەك بەستنی دەمام و دەستكێش بكرێن ئەگەر لایەنە پەیوەندیدارەكان هەنگاوی كردەیی بۆ نەنێن.

ئەلعانی راشیگەیاند: هەنگاوەكانیش خۆی دەبینێتەوە لەتوندكردنی رێكارەكان لە لایەن لایەنە ئەمنی و تەندروستییەكان و پابەندكردنی هاووڵاتیان بەبەستنی دەمامك و هەروەها پێویستە پەرەبدرێت بە كارو چالاكییە میدیاییەكان لەلایەن دەزگاكانی راگەیاندن بەشێوەیەكی گشتی و بەتایبەتیش وەزارەتی تەندروستی فیدڕاڵ.

داواشی لەهاووڵاتییان كرد كە پێویستە ڤاكسینەكانی دژە كۆرۆنا وەربگرن و بەردەوام دەستەكانیان بەمادە پاكژكەرەوەكان پاكبكەنەوەو لەشوێنە جەنجاڵ و داخراوەكان دووربكەونەوە.

PUKmedia تایبەت