بەغدا بەشەدەرمانی ھەرێم وەك خۆی نانێرێت

هەرێم راستەوخۆ دەرمان لە بەغدا وەردەگرێت،  وتەبێژی وەزارەتی تەندروستیش دەڵێت، ھیچ ساڵێك حكومەتی فیدراڵ بەشەدەرمانی ھەرێمی وەك خۆی نەناردووە.

لەوبارەیەوە دكتۆر ئاسۆ حەوێزی، وتەبێژی وەزارەتی تەندروستی هەرێم بە PUKmedia ی راگەیاند: دابەشكردن و دابینكردنی دەرمان و پێداویستیی پزیشكی لە لایەن حكومەتی فیدراڵەوە بە شێوەی ناوەندییە و پشكی ھەر پارێزگایەك راستەوخۆ لە كۆگای ناوەندییەوە دابین دەكرێت و وەریدەگرن، واتا پارێزگاكانی ھەرێمی كوردستانیش ھاوشێوەی پارێزگاكانی عیراق راستەوخۆ دەرمان لە بەغدا وەردەگرن و مانگانە ھەر پارێزگایەك پشكی خۆی ھەیە، لەبەر ئەوەش ھیچ جیاوازییەك نییە لای ئێمە و دەرمان ناگەڕێتەوە بۆ وەزارەت تا ئێمە دابەشی بكەین.

لەبارەی ناردنی بەشە دەرمانی ھەرێمی كوردستان وتەبێژی وەزارەتی تەندروستی هەرێم رایگەیاند: بەپێی دەستوور دەرمان و پێداویستی پزیشكی ئەركی حكومەتی فیدراڵە و پشكی ھەرێمی كوردستانیش پێویستە 12% بێت، بەڵام ھیچ كاتێك لەلایەن حكوومەتی فیدراڵەوە بەشەدەرمان وەك خۆی نەگەیشتووەتە ھەرێمی كوردستان و بەردەوام لەو رێژەیە كەمتر بووە.

PUKmedia بیلال بارزان