چۆن خۆمان له‌ تای خوێنبه‌ربوون بپارێزین ؟

نوێترین ڕێكاره‌كانی خۆپارێزی له‌تای خوێنبه‌ربوون به‌پێی ڕێكخراوی ته‌ندروستی جیهانی .

تای خوێنبه‌ربوون كه‌ نه‌خۆشی كۆنگۆشی پێ ده‌وترێت و به‌    Crimean- Congo Haemorrhagic Fever  ناسراوه‌ بریتییه‌ له‌تێكچوونێك كه‌ به‌زۆری به‌هۆی ڤایرۆسی ( CCHFV ) ڕووده‌دات، نه‌خۆشیه‌كی گوازراوه‌یه‌و به‌هۆی گه‌نه‌وه‌ له‌ ئاژه‌ڵه‌وه‌ بۆ مرۆڤ ده‌گوازرێته‌وه‌، یاخود ئه‌گه‌ر كه‌سێك به‌ركه‌وته‌ی هه‌بێت له‌گه‌ڵ شله‌كانی ئاژه‌ڵی تووشبوو یان كه‌سی تووشبوو، به‌پێی توێژینه‌وه‌ جیهانییه‌كان ئه‌و كه‌سانه‌ی تووشی كۆنگۆ ده‌بن به‌ ئه‌گه‌ری ( 30% بۆ 40%) ئه‌گه‌ری مردنیان هه‌یه‌.

به‌شێوازێكی گشتی نیشانه‌كانی تای خوێنبه‌ربوون ئه‌گه‌ر له‌ ڕێگه‌ی گه‌نه‌وه‌ بێت له‌ماوه‌ی ( ١-٣ ڕۆژ )دا ده‌رده‌كه‌ون، به‌ڵام ئه‌گه‌ر به‌ركه‌وته‌ی ڕاسته‌وخۆی مرۆڤ و ئاژه‌ڵی تووشبوو بێت له‌ماوه‌ی ( ٣-١٤ ڕۆژ )دا ده‌رده‌كه‌ون، كه‌ ده‌كرێت بریتی بن له‌ :
١- دروستبوونی ئازارێكی زۆری جه‌سته‌ به‌تایبه‌تیش ئێسك و جومگه‌كان.
٢- به‌رزبوونه‌وه‌ی پله‌ی گه‌رمی له‌ش.
٣- سكچوون و ڕشانه‌وه‌یه‌كی زۆر.
٤- ده‌ركه‌وتنی په‌ڵه‌ی سورو شین له‌سه‌ر جه‌سته‌.
٥- خوێنبه‌ربوون له‌ ده‌م و لووت و گوێ.
٦- لاوازی و بێ هێزی.
٧- بوورانه‌وه‌.
٨- نه‌مانی ئاره‌زووی خواردن.

- چۆن خۆمان بپارێزین ؟
١- به‌كارهێنانی ده‌ستكێش و ده‌مامك له‌كاتی نزیكبوونه‌وه‌ له‌ ئاژه‌ڵ.
٢- كوڵاندنی گۆشتی ئاژه‌ڵ.
٣- شۆردنی ده‌سته‌كان.
٤- سه‌ربڕینی ئاژه‌ڵ له‌ سه‌ربڕینخانه‌كان.
٥- له‌ ئه‌گه‌ری به‌دی كردنی گه‌نه‌ و مێش له‌ ماڵه‌كاندا، گرنگه‌ ده‌رمان به‌كاربهێنرێت بۆ له‌ناوبردنیان.
له‌ ئه‌گه‌ری هه‌بوونی هه‌ر حاڵه‌تێكی له‌ناكاو و كتوپڕ سه‌ردانی نزیكترین ناوه‌ندی ته‌ندروستی بكه‌.

PUKmedia  ئاماده‌كردنی / ژیار حسێن وسو 
 به‌كالۆریۆس له‌ كۆلێژی په‌رستاری