دامەزراوەیەكی تایبەت بە پەروەردەو خوێندنی باڵا پێكدەهێندرێت

لەرێگای پەسەندكردنی پڕۆژە یاسایەكەوە، كە ئێستا لەپەرلەمان ئامادەكراوە بۆ دەنگدان، دامەزراوەیەکی تایبەت لەشێوەی دەستە بۆ بواری پەروەردە و خوێندنی باڵا لە هەرێمی كوردستان دروست دەكرێت، وەك پاڵپشتیەك بۆ هەردوو وەزارەتی پەیوەندار و بەرزكردنەوەی ئاستی خوێندن و زانكۆوپەیمانگاكان، بەگوێرەی پڕۆژەیاساكە ئەو دەستەیە دەسەڵاتێكی باڵای دەبێت، بەو پێیەی لەلایەن سەرۆك و جێگری سەرۆكی حكومەت سەرۆكایەتی دەكرێت و هەردوو وەزیری پەروەردەو خوێندنی باڵا تێیدا ئەندام دەبن.

شەمۆڵ ئاشتی ئەندامی پەرلەمانی كوردستان لە لیژنەی پەروردەو خوێندنی باڵا بە PUKmedia ی راگەیاند: پڕۆژە یاسای( دەستەی متمانە بەخشین بەدامەزراوەو پرۆگرامەكانی پەروەردە و خوێندنی باڵا) یەكێكە لەو پڕۆژە یاسایانەی لەماوەی رابردوو لەپەرلەمان خوێندنەوەی یەكەم و دووەمی بۆ كراوەو لە كاتی ئێستا ئامادەیە بۆ دەنگدان و پەسەندكردنی، تاكو لە داهاتوو بچێتە بواری جێبەجێكردنەوە.

وتیشی: بەگوێرەی پڕۆژەیاساكە سەرۆكی حكومەت و  جێگری سەرۆكی حكومەت سەرۆكایەتی ئەو دەستەیە دەكەن، هەروەها 15 ئەندامی دەبێت، لەوانە هەردوو وەزیری پەروەردەو خوێندنی باڵاو ژمارەیەك لە  كەسانی پسپۆڕو شارەزایی بواری پەروەردە.

راشیگەیاند: كاری دەستەكە چاودێری و هەڵسەنگاندن دەبێت بۆ كارەكانی وەزارەتی پەروەردە و خوێندنی باڵاو هەموو دامەزراوە پەروەردەییەکان لەوەزارەتەکانی تر.

ئەو پەرلەمانتارە ئاماژەی بەوەشکرد: ئامانج لە دروستكردن و پێكهێنانی دەستەیەكی لەو جۆرە بەرزكردنەوەی ئاستی كوالیتی و دانانی بەرنامەو پلانی ساڵانەی خوێندن دەبێت لە هەرێمی كوردستان.

شەمۆڵ ئاشتی تەئكیدیشیكردەوە: هەر بەگوێرەی پڕۆژەیاساكە ئەو دەستەیە پاڵپشتی ماددی و مەعنەوی هەردوو وەزارەتی پەروەردە و خوێندنی باڵا دەكات، بۆیە ئەگەر یاساکە وەكو خۆی جێبەجێ بكرێت، كاریگەری باشی لەسەر بەرزكردنی ئاستی خوێندن و بەرەو پێشبردنی زانكۆكان دەبێت.

پێشتریش یەکێتی مامۆستایانی کوردستان رایگەیاندبوو بەهۆی ناکۆکی و لێکتێنەگەیشتنی هەردوو وەزارەتی پەروەردەو خوێندنی باڵا، بەتایبەتی لەبارەی وەرگرتنی خوێندکارانی 12ئامادەیی لەزانکۆوپەیمانگاکان، داوای پێکهێنانی دامەزراوەیەکی هاوبەشی لەنێوان هەردوو وەزارەت کردبوو.

PUKmedia تەها عەبدوڵڵا