سلێمانی.. چه‌ند بڕیارێك بۆ به‌ره‌نگاربوونه‌وه‌ی كۆلێرا درا

پاشنیوه‌ڕۆی ئه‌مڕۆ (۲۰۲۲/٦/۱۹ )به‌سه‌رپه‌رشتی د.هه‌ڤاڵ ئه‌بوبكر پارێزگاری سلێمانی و به‌ئاماده‌بوونی ئاوات محه‌مه‌د قائیمقامی سلێمانی و (دسه‌باح نه‌سره‌دین  به‌ڕێوه‌به‌ری گشتی ته‌ندروستی سلێمانی و قائمیقامی قه‌زاكانی (دوكان و شارباژێڕو سه‌یدسادق و شاره‌زوورو پێنجوێن) و به‌ڕێوه‌به‌ره‌كانی ئاسایش و پۆلیس و ئاو ئاوی ده‌وروبه‌ری سلێمانی و خۆپاراستنی ته‌ندروستی سلێمانی و به‌رپرسی ڕێكخراوی ته‌ندروستی جیهانی ئۆفیسی WHO له‌ سلێمانی، به‌ وردیی هه‌ڵسه‌نگاندنی بۆ دۆخی ته‌ندروستیی گشتیی و تۆماركردنی حاڵه‌ته‌كانی كۆلێرا له‌ سلێمانی و شاره‌كانی تری هه‌رێمی كوردستان و عیراق و هۆكارو چاره‌سه‌رو ڕێكاره‌ چاره‌سه‌رسازیی و خۆپارێزییه‌كان كرا.

له‌ كۆبوونه‌وه‌كه‌دا بڕیاردرا به‌:
یه‌كه‌م: پێكهێنانی لیژنه‌ی باڵای به‌ره‌نگاربوونه‌وه‌ی كۆلێرا له‌ پارێزگای سلێمانی به‌ سه‌رۆكایه‌تیی پارێزگارو به‌ ئه‌ندامێتی فه‌رمانگا په‌یوه‌ندیداره‌كان.

دووه‌م: ده‌سه‌ڵاتی ته‌واو له‌ژێر ڕێنمایی لیژنه‌ی باڵای به‌ره‌نگاربوونه‌وه‌ی كۆلێرادا درایه‌ هه‌موو سه‌رۆكی یه‌كه‌ كارگێڕییه‌كانی سنوری پارێزگای سلێمانی بۆ پێكهێنانی لیژنه‌ی هاوشێوه‌و جێبه‌جێكردنی بڕیارو ڕێنماییه‌كانی لیژنه‌ی باڵا.

سێیه‌م: ده‌سه‌ڵاتی ته‌واو درایه‌ لیژنه‌كانی ته‌ندروستی و قائمقامیه‌ته‌كان و لایه‌نه‌ په‌یوه‌ندیداره‌كانی تر، كه‌ به‌ سه‌رپه‌رشتیی سه‌رۆكی یه‌كه‌ كارگێڕییه‌كان و فه‌رمانگاكانی ته‌ندروستیی و ئاوو فه‌رمانگا په‌یوه‌ندیداره‌كانی ترو ئاسایش و پۆلیس ڕێكاری پێویست له‌به‌رامبه‌ر هه‌ر سه‌رپێچی و هۆكارێكی پیسبوونی ئاوو خۆراكدا بگرنه‌به‌ر.

چواره‌م: داوا له‌ هه‌موو دامه‌زراوه‌ حكومییه‌كان و كه‌رتی تایبه‌ت و كه‌ناڵه‌كانی ڕاگه‌یاندن و هاووڵاتیانی خۆشه‌ویست كرا، پابه‌ندی ڕێكاره‌ خۆپارێزییه‌كان بن و به‌شداربن له‌ هه‌ڵمه‌تی هۆشیاریی و خۆپارێزیی بۆ به‌ره‌نگاربوونه‌وه‌ی په‌تای كۆلێرا.

پێنجه‌م: داوا له‌ حكومه‌تی ئیتحادی و حكومه‌تی هه‌رێمی كوردستان و وه‌زاره‌ته‌كانی دارایی و ته‌ندروستی و سه‌رۆكایه‌تی دیوانی ئه‌نجومه‌نی وه‌زیرانی هه‌رێمی كوردستان و وه‌زاره‌تی ته‌ندروستی حكومه‌تی ئیتحادی كرا بۆ دابینكردنی بودجه‌ی كتوپڕ بۆ دابینكردنی پێداویستیه‌كانی به‌ره‌نگاربوونه‌وه‌ی ئه‌م په‌تایه‌و دابینكردنی ئاوی پاك بۆ هاووڵاتیان.

دواتر له‌ كۆنگره‌یه‌كی ڕۆژنامه‌گه‌رییدا به‌ڕێزان پارێزگاری سلێمانی و به‌ڕێوه‌به‌ری گشتی ته‌ندروستی سلێمانی و به‌رپرسی ئۆفیسی WHO له‌ سلێمانی، (10) حاڵه‌تی پشتڕاستكراوه‌ی تووشبوو به‌ كۆلێرایان له‌سلێمانی به‌ره‌سمی ڕاگه‌یاند، كه‌ له‌لایه‌ن تاقیگه‌ی ناوه‌ندیی عیراقه‌وه‌ په‌سه‌ند كرابوو.

PUKmedia راگه‌یاندنی قائیمقامیه‌تی پارێزگای سلێمانی